Josephine Albertus di SIMAR: “Trahado ainda ta den incertidumbre; gobierno no a bin cu un contrapropuesta riba 12.6%”

Diahuebs mainta Sindicato di Maestronan di Aruba (SIMAR) a convoca un conferencia di prensa pa asina trece dilanti informacion tocante e caso sumario cu Gobierno di Aruba a entama contra SIMAR na unda cu 2 di maart a bin dilanti e tussenvonnis.

Di e tussenvonnis aki hues a pidi pa Land Aruba kico gobierno a haci te cu awor y tambe a pidi un plan structural pa baha gasto cu por reemplasa e recorte di 12.6%, Josephine Albertus presidente di e sindicato a expresa cu diaranson nan a ricibi un documento na unda cu el a recorda cu na 2020 Gobierno di Aruba a negocia cu Hulanda di manera unilateral y despues cu nan a negocia nan a informa sindicato.

“Ora cu nan a informa y nan a splica nos cu den e ora cu nan a negocia nan a pone e salario di e trahado como garantia pa asina ey por fia placa di Hulanda, ora mi ta bisa garantia, nan a haci e recorte di 12.6% riba e salario”, el a bisa.

Pandemia di Covid-19 a yega na Aruba na aña 2020 unda cu for di e momento ey e clase trahado ya tin dos aña ta entregando y “e no tin un fecha tampoco pa sa ki dia e ta caba, te cu ainda e clase trahado ta den incertidumbre” Albertus a señala.

Di mesun manera, el a declara cu a pesar cu hues a pidi gobierno un plan structural, gobierno a presenta diaranson ultimo un documento na unda segun el a sigura gobierno no ta duna ningun claridad ni ta comprometi tampoco cu e clase trahado.

Directiva di SIMAR a analisa e documento aki y nan ta bisa cu riba e punto aki nan no ta mira un contrapropuesta di gobierno ni riba e reemplaso di 12.6% y tampoco nada riba e parti di sindicato su proposicion, manera el a afirma.

SIMAR conhuntamente cu sindicato SEPPA a presenta un proposicion na unda nan a pidi pa baha e oranan di trabou ekivalente na 87.4% cu nan ta cobrando y den e documento cu nan a ricibi nan no ta wak esey di un manera mas concreto pa duna claridad na e clase trahado, segun el a sigura.

El a indica cu nan lo saca un invitacion na e veld pa otro siman diamars 22 di maart, pa 5or di atardi nan lo sinta hunto cu e veld na SIMAR pa duna mas informacion tocante esaki, contesta riba preguntanan y fiha un posicion pa asina duna un contesta na gobierno pa motibo cu ora SIMAR ta bisa algo, no ta loke sindicato kier sino cu nan ta vocifera e inkietud di e veld cu nan ta representa.

Como directiva nan ta haya lamentabel cu den e documento tin algun cos cu segun Albertus a sigura ta contradictorio, den e documento gobierno a indica cu nan ta presentando algo tentativo “pero mester na cuenta cu ainda e no a bay CAft, e no a bay rijksministerraad, dus nan no sa ainda kico nan ta bezig riba dje y mi ta haya esey contradictorio pasobra bo ta bisa un cos, anto di otro banda den e publicacion mes bo ta duna algo otro”, Albertus a expresa.

Ademas, el a declara cu nan tambe ta lamenta cu ora nan a bay corte nan a bisa cu gobierno tin e clase trahado den incertidumbre pa dos aña caba y ainda nan no por duna nada structural, nan como directiva ta considera cu si gobierno a bin cu un plan pa mustra cu den un tempo determina nan lo por haya e 12.6% back.

“Loke ta bisa akiden ta bisando cu por lo pronto Aruba ta depende di ayudo financiero di Hulanda, nan ta bay back tambe na e rijksministerraad di 15 di mei 2020 na unda ta wordo bisa cu tanten Aruba ta depende di ayudo financiero di Hulanda y awor trahado ta keda den incertidumbre”, el a declara.

1 di februari ora nan a bin dilanti cu e plan di traha oranan cu nan ta wordo paga p’e, Albertus a bisa cu nan a tene den cuenta e cantidad di hende cu ta traha den e veld, cantidad di alumnonan, e leynan cu tin existente, pa asina gobierno por presenta algo bon hinca den otro, “pero nan no a bin cu nada, loke gobierno a haci ta entama un kort geding contra nos y esey a buta cu ya, aworaki bo tin un suma cu ta colga riba bo cabes”, el a enfatisa.

E kort geding no a finalisa manera Albertus a comenta unda cu nan ta bezig den tramite y mirando cu nan a haya e mandato den inicio cu gobierno no kier haci cambio y nan kier traha ekivalente den ora aworaki den e tussenvonnis a bin un exigencia di hues unda el a pidi gobierno algo, nan como sindicato tin dos siman pa duna un contesta y den nan rol como sindicato nan ta bay back na nan veld pa por fiha un posicion y manda esey back como contesta na e documento cu gobierno a manda.

Pa finalisa, el a invita tur trahado den area di enseñansa pa dia 22 di maart asisti na e reunion cu sindicato lo tin cu e veld pa tuma un posicion, “esey ta e momento cu a bo como clase trahado den veld di enseñansa ta haya e chens pa vocifera, pa duna bo opinion, pa mañan ora e documento di e contesta bay back pa gobierno, bo sa cu bo tambe a forma parti di dje”, el a comenta.