(NTN24) – Conseho Nacional Electoral a habri un investigacion preliminar contra e candidato presidencial Gustavo Petro pa supuesto violacion den loke tin di haber cu e parti di financiacion.
Pedro Felipe Robledo, magistrado cu ta encarga cu e caso, a ordena recopila pruebanan y haya copia di tur e cuentanan bancario di e campaña di e candidato.
Gustavo Petro a gana su luga como candidato pa presidencia cu e partido Pacto Historico despues di gana e consultanan presidencial di 13 di maart ultimo.
Esaki lo ta e di tres biaha cu e candidato ta busca pa yega na Cas di Nariño y ta uni na e carera presidencial hunto cu Sergio Fajardo, Federico Gutierrez, Ingrid Betancourt, Rodolfo Hernandez, Enrique Gomez, German Cordoba y Luis Perez.
Petro di 61 aña ta un politico di iskierda “progresista” cu a combati contra Estado ora e tabata pertenece na M-19, un guerrilla nacionalista di origen urbano. El a ser encarcela un aña y mey prome cu acuerdo di paz a ser firma na 1990. Economista, admirado di mapanan y orado di plasanan publico, el a briya como senador y na 2011 a yega na alcaldia di Bogota.
Pa via di su maneho di recoleccion di sushi -cu a kita for di companianan priva-, el a ser retira temporalmente. Na 2018, cu su di dos campaña presidencial, el a haya e mayor votacion cu nunca antes iskierda a logra, pero el a perde den e di dos buelta.
Su di tres avance na Cas di Nariño ta cuminsa cu un apuesta contundente di mas di 4 miyon voto den e consulta primario.
“Pacto Historico a logra e miho resultado di progresismo den historia di Colombia”, el a celebra despues di conoce e resultadonan parcial di e consulta y di esunnan legislativo.
E ta priminti un gobierno reformista y di separacion cu economia petrolero, elitenan tradicional y cu enfoke den medio ambiente.
