Den un conferencia di prensa na Cas di Cultura, Sr. Ferdinand Franca, docente di CKV na Maria College Mavo, hunto cu directora di Maria College Mavo, Angeline Rosenstand a anuncia e musical “Planta Awe Cosecha Mañan” cu lo tuma luga den luna di april den conexion cu e celebracion di 80 aña di existencia di Maria College Mavo.

Franca a splica cu nan a cuminsa na aña 2019 cu e programa despues di scol cu tabatin como tema e aña ey Turista riba Mi Isla, pero pa motibo di e pandemia mester a pospone esaki. “E aña aki nos tin e grato noticia cu nos ta bay cu e musical aki y esaki den conexion cu e celebracion di 80 aña di Maria College Mavo. E musical aki ta un cooperacion di e grupo di teatro CCCA, Crea Cultiva Arte y Cultura na Aruba hunto cu Maria College” Franca a indica.

Grupo di Teatro CCCA ta un fundacion nobo y un di e metanan di e fundacion nobo aki, Franca a splica, ta pa involucra mas hoben den loke ta trata e arte escenico na Aruba. E fundacion tin como meta prepara, guia, e futuro directornan di teatro, e futuro presentadornan di shownan. “Ta yega un momento cu nos grandinan ta retira y pa salvaguardia tur esaki nos ta preparando e hobennan for di awo caba”, el a agrega.

Pa loke ta trata e obra mes, Franca a informa cu esaki ta parti den dos acto. E prome acto ta bay enfoca mas den pasado y con hendenan tabata biba antes. E ekipo a haci hopi investigacion ariba con e hendenan tabata biba antes, kico tabata e temanan di e temponan ey etc. pa asina trece esaki den e musical. E segundo acto ta completamente moderno combina cu un futuro prometedor. E obra ta conta cu un elenco di 50 hoben, cu ta inclui alumnonan y ex-alumnonan.

El a agrega tambe cu den e musical pa loke ta trata e parti di baile lo tin diferente genero, e parti di actuacion, teatro ta bay ta innovativo, lo tin un arte visual y tur loke ta e musica ta componi aki na Aruba mes.

Rosenstand, directora di Maria College Mavo a remarca cu Maria College ta un scol unda trabou den ekipo ta hopi importante. “Nos lema “I am because We are” ta refleha e habilidad di traha hunto pasobra trahando hunto nos ta yega leu den bida”, el a expresa.

El a menciona cu e ta hopi orguyoso di team dinamico na Maria College Mavo, caminda alumnonan, ex-alumnonan, mayornan tur a bini hunto bao liderazgo di Ferdinand Franca pa saca e potencial di e hobennan, locual el a enfatisa ta sumamente importante pa e hobennan adkiri habilidadnan pa futuro.

“E simia cu nos planta awe den nos hobennan nos lo cosecha, nan ta bira hendenan den comunidad cu lo yega hopi leu den bida. Arte ta un di materianan hopi importante caminda nos hobennan ta adkiri habilidadnan di siglo 21. Mundo ta cambia constantemente y nos tin cu siña cambia hunto cune”, el a agrega.

Shaindra Ashby, un ex-alumno di Maria College Mavo, ta forma parti di e musical “Planta Awe Cosecha Mañan” tambe tabata presente y el a expresa cu desde cu el a stap na Maria College el a haci hopi baile durante su añanan como studiante na e scol.

“Mi ta contento di ta ‘kinan atrobe cu Maria College. Mi ta bay canta y mi ta bay baila, y mi tin e tarea di traha e bailenan pa e musical, hunto cu mi grupo di baile Empire Dancers y otro gruponan di baile”, Ashby a bisa.

Nigella Kost, otro ex-alumno di e scol lo ta e co-director di e musical y lo actua tambe den e musical. “Mi ta encarga di wak tur e actornan papia cu nan, bisa nan kico tur nan por haci ora nan ta actuando. Mi ta envolvi desde e comienso di e musical, ami y Ferdinand durante full e pandemia nos tabata comunica y delibera con nos por haci e musical y tambe con nos por mehora tur cos pa hendenan por relaciona nan mes na e storia cu nos ta bay presenta”, el a indica.

Stanley Dabian tabata presente den representacion di Departamento di Cultura (DCA). Dabian a splica cu como Departamento di Cultura manera cu Franca a acerca nan cu e idea di e proyecto, DCA a kere den e proyecto aki y ta dentro di nan prioridad di educacion di arte y cultura na Aruba. “Mas cu claro nos ta gradicido cu e tempo dificil a pasa y cu tarima atrobe por haya bida”, el a expresa.

Franca a enfatisa e importancia di e apoyo pa produccionnan local manera e musical aki. “Ban apoya e produccion nacional di Aruba, e arte escenico di Aruba. Nos mester cuminsa apoye. Awo cu tin nos mester apoy’e, ora cu no tin nos ta keha y tin fondonan di afo cu ta cla pa duna nos e apoyo, pero nos mester cuminsa produci y e momento a yega pa traha hunto pa e directornan uni y pa nos reforsa loke ta e parti di arte escenico na Aruba y nos mester cuminsa produci mas. Esey ta nos meta final”, el a remarca.

Por ultimo Franca a invita pueblo completo pa presencia e musical, un produccion local cu lo tuma luga ariba 8 y 9 di april. “E ta un produccion local. Nos no tin hopi produccionnan local, semper nos ta busca produccionnan di afo y nos ta duna balor na esey. Pero ban duna balor na loke ta di nos, nos hobennan, nos artistanan local y esey mi ta invita tur pa bin presencia e obra”.