(ElNacional) – Meta, e empresa madre di Facebook, Instagram y Whatsapp, a inclui Venezuela den su programa di verificacion di datonan cu e incorporacion di Cotejo.info. Ta trata di un plataforma di comunicacion digital Venezolano crea pa e Asociacion Civil Medianalisis cu ta pone e lupa ariba e discursonan di e autoridadnan.
“E aliansa cu Meta pa verifica informacion falso ariba Facebook y Instagram ta importante pa fortalece e tarea cu nos ta cumpliendo for di periodismo den lucha contra mal informacion”. Asina e director di Cotejo.info, Andres Cañizalez, a bisa segun un comunicado di prensa.
Di acuerdo cu Cañizalez, hopi Venezolano ta acudi na e rednan social den buska di noticia, ademas di usa nan pa intercambio cu familiar- y amigonan.
“Cu e experiencia di Cotejo.info den e verificacion y chekeo di datonan, nos por contribui pa asina tin informacion di miho calidad. Pa nos e ta un desafio profesional y un manera di presta un servicio publico na Venezuela”, el a agrega.
Cotejo,info lo ta e prome socio local di Meta na Venezuela. Mescos cu e resto di e miembronan di e programa, e ta conta cu e certificacion di International Fact-Checking Network di e Instituto Poynter pa estudio di media.
Na Latino America e proyecto ta inclui tambe medionan di comunicacion y plataformanan di verificacion.
“Meta ta usa e rapportnan di comunidad y señalnan capta pa e inteligencia artificial pa detecta publicacionnan potencialmente malo of impreciso. Esakinan ta wordo manda na e verificadornan a wordo examina”. Asina e compania a detaya den nan comunicado di prensa.
Segun Cotejo, e sociedad Venezolano ta sufriendo ariba e plano ciudadano di un circulacion di informacion ekilibra y transparente limita ariba e acontecimentonan nacional den e medionan di comunicacion tradicional.
