(LaPatilla) – Lider di regimen Venezolano, Nicolas Maduro a menciona diamars cu durante e combersacion cu e tabatin cu Alto Comisionado di Nacionnan Uni, Michelle Bachelet, el a admiti e falta di medicamento na e pais, pero no sin prome tira e culpa ariba gobierno di Merca y e sancionnan imponi contra funcionarionan chavista.
“Ayera nos tabatin un combersacion cu Michelle Bachelet y nos a papia di tur loke cu nos a bin ta haci den e lucha contra e sancionnan criminal cu ta persigui Venezuela y e medicamentonan cu nos tin mester”, Maduro a bisa durante di un discurso via VTV na e Palacio di Miraflores.
Despues di esey el a indica: “Nos a encontra hopi incoveniente pa trece medicamento pa e pais, nos ta trece medicina for di occidente y nos mester a desvia nan. Pero nos no ta bay stop di cumpli y combati contra e sancionnan criminal”.
Mientras e tabata papia, Maduro a nenga a situacion critico di Venezuela durante e pandemia sigurando cu e pais tabata pionero den e lucha contra COVID-19, ora cu miles di Venezolano no tabatin ni awa na nan cas pa por a laba man y cumpli cu e medidanan sanitario of ora cu nan no por paga e medicamentonan ni material medico den caso cu nan bira malo cu e virus.
