Diamars den oranan di atardi, partido Raiz a tene un conferencia di prensa durante cual parlamentario Raymond Kamperveen, lider di fraccion Raiz den Parlamento di Aruba, a elabora ariba energia transitorio y introduccion di proyecto di hidrogeno na Aruba.
Kamperveen ta indica cu manera ta conoci, den e ultimo temponan tabatin hopi discusion ariba e transicion pa energia sostenibel y hopi biaha por a tende partido Raiz ta papia di hidrogeno. Pa e parti aki, Kamperveen a indica cu ariba diabierna 18 di maart e partido lo introduci un poco kico hidrogeno ta.
“Nos tin dos proyecto cu ta bay tin aki na nos Mangashina na Koyari, unda nos lo tin un auto cu a wordo converti y ta core ariba hidrogeno, y tambe nos ta bay tin un mini sistema di hidrogeno cu ta wordo traha via solo”, el a splica.
El a remarca cu ta hopi importante pa papia ariba e tema aki door di e cambio cu Gobierno kier haci pa LNG y despues pa hidrogeno, cu ta algo cu ta forma parti di e futuro cu Aruba ta bayendo den dje. El a enfatisa tambe cu e realidad ta cu mester corda cu hidrogeno ta un mescla di e energia sostenibel cu nan kier bay den dje.
El a splica cu e esaki tambe ta importante, pasobra si Aruba bay completamente den hidrogeno e ta bay bira hopi caro pa comunidad na Aruba paga. Pero segun el a informa si mescla hidrogeno den diferente tipo di energia sostenibel lo por us’e por ehempel pa transporte publico.
“Nos sa cu barconan ta cambiando pa bay den e blue hydrogen, cu tin di haber tambe cu e diesel cu ta bay hunto cu e hidrogeno. Tambe tin cambionan tumando luga den aviacion pa loke ta trata e uso di combustibel y tambe ta bayendo den direccion di blue hydrogen. Nos tin cu corda tambe cu pa electricidad, eigenlijk e no ta factibel pa nos bay full den hidrogeno pasobra e ta hopi caro”, Kamperveen a señala.
El a subraya tambe cu un otro parti hopi importante cu mester recorda ta cu mester bay den e direccion di molina di biento y energia solar, pero den e caso aki el a enfatisa molina di biento, pasobra segun el a bisa, esey lo por yega mas lihe na 50% di energia sostenibel.
Kamperveen menciona tambe cu Minister di Integridad, Naturalesa y Asuntonan di Adulto Mayor, Ursell Arends ta trahando ariba e situacion di Parkietenbos y e intencion, el a splica, ta pa skep loke tin eynan y pa asina den futuro por pone un solo parke riba e area ey cu cooperacion di ciudadanonan cu lo por sostene esaki.
Pa loke ta trata e tema di LNG, Kamperveen a ricibi pregunta di miembro di prensa tocante e proceso di esaki. El a contesta cu segun el a compronde, e proceso ta cu LNG tin cu cumpli cu cierto rekisitonan, cierto permisonan, y tanten cu e no cumpli cu eseynan e no por ta cla. El a indica cu ta hopi rekisito e mester cumpli cune prome cu e yega WEB.
“Mi ta kere si e no ta bon hinca den otro, mi ta kere di mes LNG tambe tin chens di cay afo, pero nos tin cu busca solucion. WEB ta usando di su placa, di su presupuesto, pero na un momento e ta bay caba y esey ta un pregunta cu mi a haci na WEB tambe, con ta bay haci despues. Nan ta bin bati na porta manera Serlimar? Mi no ta kere esey ta e intencion, dus nos mester adelanta di esey”, el a splica.
El a remarca cu nan ta pendiente di e proceso y e ta spera cu tur cos por cana bon pa Aruba no cay atras pasobra, segun el a enfatisa, LNG ta un transicion. Hidrogeno ta un parti di dje y e parke di molina cu mester bin tambe nan lo apoya completamente.
“Parke Nacional, Aruba completo, e NGOnan mester compronde kico ta e balor den esaki pasobra unabes nos pone un parke mas, e ta cumbini nos tur, pasobra nos ta yuda baha e gasto. Mirando tambe e situacion na Rusia y cu nos ta depende un tiki ainda riba e heavy fuel oil bo ta wak e efecto di biaha”, el a señala.
Por ultimo el a ratifica cu nan ta sigui pusha pa hidrogeno y otro tipo di solucionnan sostenibel y a invita tur persona interesa pa siña mas tocante hidrogeno pa pasa y observa e dos proyectonan cu nan lo tin pa publico diabierna awo.
