Isla di Aruba ta den un crisis y nos ta manera un barco sin capitan y sin rumbo. Un gobierno sin vision y sin capacidad pa por saca nos for di e crisis actual.

WEB N.V. tabata tin tur tempo di mundo pa hedge ora prijs di crudo tabata abao pa sikiera mantene nos prijs di electricidad y awa na un prijs abao y aña pasa por a hedge ainda pero nan prioridad tabata pa bula cabes di e directornan di WEB y awor di meneer Ras. Ta pag’e 400 mil florin pa bay. Segun informacion cu nos a ricibi tin un cabes mas den WEB cu mester wordo bula. Asina nos di partido Curpa ta kere cu e golden handshakenan lo a surpasa 3 miyon florin. Riba dje a hinca WEB den un debe di 700 miyon florin y AAA den un debe di 525 miyon di florin. Pueblo di Aruba unda e gobierno aki kier hiba nos isla?

E relato di CAFT ta mustra cu gobierno no sa di goberna y ta bon draai rond y no ta haci nada pa nos isla. Pueblo di Aruba no mester lubida cu e acuerdo firma e diabierna scur di 13 di November 2020 unda cu a entrega nos Status Aparte. A subi nos debe nacional di 70% te 128% di nos GDP. Sigur sigur nan no ta miho cu e gobierno anterior. Ningun protocol firma nan a cumpli cune. Pueblo ta corda e protocol di November 2018 caminda a priminti di baha gasto riba personal di gobierno? Al contrario nan a aument’e y awe CAFT mes ta bisa cu a baha gasto cu e 12.6% riba salario di empleadonan publico pa asina e fiesta di sigui malgasta placa di pueblo por continua.

Awor gobierno ta kita un otro director di Dimas. Pa colmo ta nombra un coordinador den e management team di Dimas cu antecedentenan penal. Esaki si ta e ultimo gota den e hemchi. Pueblo di Aruba corda riba e caso poco dia pasa ey caminda hues a duna un veredicto cu e persona mester bandona Aruba y contra tur etica di bon gobernacion e Minister di Labor, Integracion y Energia ta firma pa e persona keda Aruba. Asina tin mas informacion cu caya ta papia di kehonan di ilegalnan cu a drenta nos isla clandestinamente ta wordo aresta mainta y atardi tin nan permiso. Nos di partido Curpa ta kere cu no ta e director di Dimas mester bay cas sino e ministro aki mester drecha su maleta y haci nos isla un fabor di entrega su retiro paso e no ta integro.

No ta pasa un dia cu pueblo ta tende di corupcion y di inhusticia. E gobierno aki a perde tur su streanan. Unda cu bo bay bo ta tende keho di pueblo y ta expresa nan malcontento cu gobierno. Dia di Himno y bandera ta den porta pero den realidad ta na luto nos pueblo mester ta paso no tin motibo di celebracion. Kico nos ta celebra si nos pueblo tin un sufrimento profundo. Esaki ta e consecuencia di vota pa partidonan cu no ta respeta leynan di Dios y cu nan fuente no ta Dios. Awor nan tin cu sinta riba nan blaar paso locual cu nan a sembra awor ta e tempo di cosecha. E gobierno aki no tin e bendicion di Dios pa goberna nos isla. Gañamento y manipulacion ta bruheria. Unda Dios wordo exclui no tin bendicion sino miseria.