(La Nacion) – Senador y ex-guerrillero Gustavo Petro ta e vencedo grandi di eleccionnan di diadomingo ultimo na Colombia: no solamente a haya e nominacion di iskierda, sino cu tambe a avansa den Congreso, pasando riba e derecha cu ta na poder, den bispo di eleccionnan presidencial di dia 29 di mei.
E candidato di 61 aña a gana den eleccionnan primario cu a tuma luga simultaneamente cu eleccionnan pa renoba dos camara di Congreso di casi 300 asiento.
Petro a haya 4.4 miyon di voto di apoyo contra 778.000 di e ambientalista Francia Marquez, pa asina haya e candidatura presidencial di su partido Pacto Historico, e aliansa di iskierda, pa un bentaha di 66 punto porcentual, segun e resultado oficial di 98% di e urnanan.
Na mesun tempo, cu mesun 98% di resultado, e coalicion di e cual Petro ta lider ta proyecta como e prome forsa di e Senado hunto cu conservadornan, cu 16 asiento cada un, dilanti di e liberalnan cu 15.
Den Camara di Diputado Pacto Historico a haya 25 di 165 asiento, tras di liberalnan cu 32 y igual cu conservadornan, di acuerdo cu Registraduria Nacional.
Petro ta e candidato presidencial cu mas voto y a celebra cu su partidarionan na un hotel di Bogota. Emociona y hunto cu Marquez y otro rivalnan di e primaria el a señala cu: “Pacto Historico a logra e miho resultado di progresismo den historia di Republica di Colombia”.
Forsanan di iskierda ta conkista por lo menos 41 asiento di ambos camara, mas di e tripel den ultimo eleccionnan legislativo y riba 17 cu a haya na 2006, su miho resultado.
Mas sigur cu Pacto Historico lo haya apoyo di Comunes, partido di iskierda cu a surgi di acuerdo di paz cu e desaparecido guerrilla FARC y cu door di e acuerdo ey tin reserva dies luga. Centro tin perfil como e di tres forsa.
