Edgar Arends tabata sentencia pa a horta dato di computer for di FCCA; decision ratifica pa Hoge Raad

Miembro di team di maneho di DIMAS ta un hende cu a yega di comete un crimen y a haya castigo p’e. Ta trata di Edgar Arends kende ta conoci como un di e personanan mas yega na ex Minister Andin Bikker. E tabata un di su coordinadornan principal y tambe un campañador fiel.

Pero prome cu esey, Sr. Arends a crea un hurisprudencia cu te awe tin impacto. Esta cu dato di computer ta un producto cu derecho di posesion cu mester di proteccion. Edgar Arends a haya castigo pa a horta dato di computer for di FCCA, y a bringa su sentencia te na Hoge Raad y a perde esaki.

Arends a haya un castigo di Corte Comun di Husticia dia 20 di Juni 1995 cu a considera cu a keda proba cu Sr. Arends, na diferente momento, entre 1993 y 1994, a tuma posesion di forma ilegal di datonan di computer cu tabata pertenece parcialmente of completamente na FCCA. Arends tabata e ‘systeembeheerder’ di FCCA e tempo ey.

Den e aresto Computergegevens FCCA NJ 1997/574, a mustra cu Sr. Arends mes a admiti di a tuma e datonan, copia riba computerdisc y cu a hiba nan su cas. Durante e buskeda, polis a topa cu un carta interno y confidencial cu e ex Director F. Hoevertsz a manda pa Directiva di FCCA. Es mas, Arends mes a print e carta, sin a haya permiso y a hib’e cas. El a traha un cantidad di copia di file riba Hoevertsz sin permiso, ademas cu henter e ‘backup’ di e automatisacion di FCCA cu polis a topa cune na su cas. Arends mes a admiti cu e no a haya ningun autorisacion pa horta e datonan of saca nan for di e espacio di FCCA. E regla tabata stricto, esta cu e ‘backups’ mester tabata den caha fuerte na FCCA, na banco pero no ta na cas di e systeembeheerder.

Hof, despues cu Arends a apela su caso, a considera cu el a comete ‘valsheid in geschrife’ y desfalco di su funcion. Arends a haya un luna di castigo di prison cu un tempo di prueba (proeftijd) di dos aña, ademas cu el a perde su trabao.

Dato ta producto

Edgar Arends a dicidi pa apela e decision di Hof na Corte di Casacion, y aki el a haya asistencia di e famoso abogado Gerard Spong, kende a argumenta pakico no por considera datonan di computer como un ‘producto’ den sentido di articulonan 334-335 di e Codigo Penal di Aruba.

Sinembargo e discusion den Corte di Casacion riba e tema aki ya tabatin hopi andando. For di 1979 caba. Desde e aresto di Corte di Arnhem, NJ 1984, 80 tin un discusion si mester considera datonan di computer (software) como un producto den sentido di articulo 310 y articulo 321 di Codigo Penal di Hulanda. Sinembargo, segun Spong, basa riba e Codigo Penal di Aruba e tempo ey no por considera datonan di computer como un producto riba cua tin derecho di propiedad y consecuente a exigi pa Corte di Casacion destrui e sentencia di Hof. “ Corte Comun di Husticia tabata ‘liever lui dan moe,’ den e caso aki,” Spong a argumenta, pasobra no motiva pakico a considera datonan di computer como un producto cu derecho. No por horta algo riba cua no tin derecho riba dje, tabata e pensamento di e abogado kende a enfatisa cu usa e aresto di Arnhem no ta cuadra ya cu den e caso ey si tabatin un areglo legal separa pa datonan di computer. Mas ainda, Spong a bisa cu Aruba tabata un pais autonomo, cu su mesun desaroyo legal. “Na Hulanda ta produci hopi mas riba tereno legal cu Aruba, pero por duda si esaki ta hustifica e conclusion cu e ta produci un cultura legislativo mas fuerte, cu ademas tin un zonido colonial fastioso,” Spong a argumenta. Mas ainda, e datonan original a keda na FCCA.

Pero e argumentonan aki no a yuda Arends, pasobra Hoge Raad a rechasa nan y a confirma e sentencia di Hof y asina a solidifica y codifica cu na Aruba tambe, dato di computer ta un producto cu derecho y balor.

Mientrastanto, awor Edgar Arends, como Presidente di e Team di Maneho ta encarga cu e proceso na DIMAS unda, manera ta conoci, no solamente ta trata cu datonan personal di esnan cu mester di permiso, pero tambe ta haya un cantidad di detaye financiero y personal di ciudadanonan y/of companianan cu ta entrega peticion na DIMAS.