(NTN24) – Presidente di Colombia, Ivan Duque diahuebs ultimo a bisa cu el a ofrece petroleo Colombiano na su colega Mericano, Joe Biden, despues di e biahe cu a haci cu funcionarionan Mericano pa Venezuela den cual a trata e topico di energia.
“Awe Colombia ta un pais cu tin mas capacidad di suministra hidrocarburo di loke Venezuela tin awor” Duque a sigura den un conferencia di prensa, despues di reuni na Cas Blanco cu Biden.
E mandatario Colombiano a plantia na Biden cu Colombia “por y kier yuda na stabilidad energetico mundial”, specialmente den memey di incertidumbre di suministro y prijsnan pa invasion Rusiano na Ucraina.
Merca ta buscando maneranan di reemplasa e importacion di petroleo Rusiano, prohibi pa Biden despues di e ofensiva di Moscu, y Cas Blanco a bisa cu “siguridad energetico” tabata parti di e conversacionnan di un delegacion Mericano cu a biaha e fin di siman pasa pa Caracas.
Esaki a lanta speculacion cu Merca lo por a reanuda e compra di petroleo Venezolano, bao embargo for di april di 2019 den marco di sancion cu Washintong a pone na Caracas despues di e reeleccion di e mandatario Nicolas Maduro den un eleccionnan cu a ser cuestiona.
Duque a sostene cu Colombia ta produci mas di 890.000 bari pa dia y “proximamente lo por” yega na mas di un miyon di bari pa dia.
Tambe a destaca proyectonan como por ehemplo esun cu e petrolero Mericano Occidental Petroleum. Y a señala inversionnan di e Colombiano Ecopetrol na Permian di Texas, na unda segun a bisa cu actualmente ta produci 50.000 bari pa dia pero cu den proximo añanan por subi na 150.000.
“Colombia por contribui y nos kier contribui na e prijsnan y stabilidad mundial di energia, specialmente den e circunstancianan cu nos ta bibando aworaki”, Duque a indica.
Tambe el a bisa cu el a plantia na Biden e aporte cu Colombia lo por haci den abastecemento di hidrogeno berde pa Europa y Merca.
