Secretario di estado nobo…Mesun maneho ta continua…

Nos por a tuma nota di e carta cu secretario di estado pa asunto di Reino recientemente a manda pa Tweede Kamer den cual el a duna un resumen extenso di e situacion cu el a encontra na e islanan di Reino den Caribe. Esnan cu pa un momento a pensa cu e yegada di un secretario nobo lo a cambia posicion di gobierno Hulandes, y por lo tanto di gobierno di Reino, lo a keda decepciona pasobra e mensahe a keda mescos, cu enfasis riba e medidanan cu mester tuma pa sali di e crisis y yega na e reformanan necesario.

E secretario di estado ta señala Aruba como e caso mas preocupante pa su situacion financiero gubernamental, cu un debe compara cu GDP di 114%, un diferencia bastante grandi cu e dos otro islanan autonomo, cu respectivamente 90% y 73% pa Corsou y Sint Maarten. El a bisa algo nobo aki? No, pero e pregunta ta si ta mira igual urgencia den e accionnan di gobierno local, si di tur banda ta acepta cu e situacion ta serio. Por ehemplo, ta te awor a cuminza tramita consulta cu e gremionan empresarial riab reforma fiscal, unda a duna solamente algun indicacion general, cu absolutamente no por satisface. No cu nos ta bisa cu gobierno mester bay na amen di ningun gremio, pero si den e propio Uitvoeringsagenda acorda cu Hulanda a aparece pa basta tempo e cifra di 12,5% di BTW, pa bin na vigor 1 di januari 2023, anto no ta straño cu ta haya reaccion riba un repentino cambio pa 18% general y un tarifa reduci pa cuminda di 6%.

Ademas, no tin claridad encuanto e demas medidanan cu mester bay hunto cu e introduccion di BTW, salvo e aumento di e suma bao di cual no ta paga inkomstenbelasting. A keda debe nos e opruiming cu por haci den diferente impuesto cu practicamente ta costa mas cu loke nan ta trece aden. Ehemplo: zegelbelasting y dividendbelasting. E ultimo aki ta keda un pregunta grandi, sigur si mira cu gobierno ta dispuesto pa baha winstbelasting, mientras cu como estimulo pa economia ta mucho mas atractivo elimina e dividendbelasting, cu ta fungi como un ‘second round’ di cobranza riba ganashi di empresa, cu ta conduci na tene placa den compania como reserva, envez di paga dividend na accionista, loke por crea mas probabilidad di inversion.

E argumento cu probablemente lo usa den e asunto aki ta cu tin miedo pa un exportacion mas fuerte di capital… Pero, no ta net pa e companianan mas grandi tin areglo special manera ‘IPC’ bao di cual net nan practicamente no ta paga dividendbelasting? No ta net anan ta responsable pa exportacion di capital, aunke den un economia habri manera di nos e no por ta nos mayor preocupacion pa tene capital stranhero aki. En todo caso, manera e situacion ta awor, esnan cu tin mas molester di e dividendbelasting ta e empresanan di menor tamaño. Pero nos no ta caba di yega na e conclusion cu desaroyo economico den futuro cercano lo mester bin di empresa mediano y chikito? Pakico anto ta mantene obstaculo di crecemento pa nan, mientras cu e beneficio pa gobierno mes tambe ta minimo? Y pakico nos no ta tende e gremionan empresarial trece e tema aki dilanti? Cual ta e obstaculo pa boga pa abolicion di dividendbelasting pa tur empresa?

Nos ta haya e impresion cu gobierno no tin ningun pura cu introduccion di e BTW, y lo ta contento cu tur confusion cu tin pa despues bira bisa Hulanda cu nan no ta keda cla pa 2023 pa introduci e ley. Si di berdad tin pura, anto nan mester por ta mas diligente den trece e asunto completo dilanti y nos no ta mira esey. Kico por ta motibo di e tardanza? Cu en realidad no tin e voluntad politico pa introduci BTW, pero cu den cuadro di cooperacion cu Hulanda no por haci nada otro cu bay di acuerdo. Sin embargo, den e actual situacion internacional insigur, cu un inflacion fuerte bao influencia di e factornan externo so caba, ta probable cu introduccion di un impuesto indirecto nobo, na e nivel di tarifa indica, ta bay causa un inflacion interno bastante fuerte, bayendo den direccion di campaña electoral. Y esey por ta suficiente pa cambia e panorama electoral, aunke tin factor ta papia na desfabor di e otro partido grandi. Esey ta e casonan penal contra e ex-ministronan, cu tur tres a sali di e cuna democrata cristian, loke ta lanta e interogante – genuino – kico por spera di un partido cu no ta duna ningun señal di aceptacion di nan responsabilidad den mantene un ambiente interno propicio pa criminalidad grandi.

Esaki na su turno ta crea posibilidad pa e demas partidonan, si nan ta capaz di convence e electorado cu nan por brinda un ruta diferente pa sali di e actual crisis. Esey sin embargo, ta parce mas bien imposible, ya cu tur cambio cu por tin ta bay via e caminda di medida, delinea caba hunto cu Hulanda. Eleccion di e siguiente parlamento no lo mester ta a base di loke nan priminti, sino a base di e confianza cu nan por ehecuta e plannan di reforma. Manera anticipa, a cambia di secretario di estado, pero no di maneho di e crisis actual.