ABV a reuni cu Minister di Salud

Ayera mainta presidente di ABV, Gina Maduro, durante un conferencia pafo di hospital cu algun medio di comunicacion local, a splica cu nan a reuni cu Minister di Salud Publico, Dangui Oduber, pa trece nan preocupacionnan pa dilanti pa locual ta trata e reunion general y accion cu a tuma luga dialuna, y tambe desaroyonan cu ta pasando den hospital.

Maduro a indica cu gobierno ta na altura di e situacion, di e recorte y e consecuencianan ta pa tur e organisacionnan, no solamente pa hospital pero tambe ImSan, Respaldo y FSLMA. Pero hospital ta e organisacion mas grandi unda tin gran parti di e servicionan y e 5.5% pa hospital, segun el a splica, ta un suma astronomicamente halto, di 10 pa 11 miyon florin pa aña, sin conta e 2% di indexering cu no a duna cu ta bira un total di 15 miyon y sin conta inversionnan cu tin cu wordo haci cu ta 25 miyon florin.

El a enfatisa cu esey ta pone hospital den posicion hopi dificil cu e no por cumpli cu tur e responsabilidadnan pa loke ta trata cuido y sobre todo e gastonan di personal cu lo bay tin problema cune.

Maduro a remarca cu hospital tin hopi reto y un di e retonan, problemanan, mas grandi ta e situacion ilegalidad, indocumentadonan. Segun el a señala, hospital tin un perdida di 250 mil florin pa luna, esaki ta solamente di indocumentadonan, pasobra nan ta bin via SHE nan tin derecho di haya servicio di cuido, nan ta haya e cuido, ta yega na un areglo pa pago, pero e placa ta drenta hopi poco poco.

“Mester corda cu na final tur hende tin derecho di haya cuido y ta unico hospital caminda por drenta y keda admiti. Pa aña hospital tin un perdida di tres miyon florin y e tres miyon ey ta net pa paga trahado parti di nan salario. Si nos tabata e haya placa aki lo tin menos efecto pa e trahadonan. Nos ta duna servicio y ora pashent drenta nos no ta wak su status si e ta legal of no y e ta haya su servicio. Pero gobierno mester pone atencion ariba e parti aki pasobra e post aki ta birando mas grandi”, el a agrega.

Maduro a menciona cu Minister Oduber ta consciente di e situacion y segun el a subraya e unico solucion cu tin actualmente ariba corto plaso, pasobra tur caminda tin e mesun problema, apesar cu tin resistencia ta cu mester bin un cooperacion entre ImSan y hospital. “Nos mester wak bienestar general di pais Aruba”, Maduro a bisa. “Tur persona cu ta sigura y tin un carchi di AZV merece un cuido completo, no mita cuido. Mester yega na un MoU unda e dos instancianan mester traha na bienestar di pais Aruba y no eigen belang”.

Pa loke ta trata e mandato cu ABV a ricibi for di su mimebronan, Maduro a splica cu e mandato aki ta pa mantene tur hende na pia di trabao, no manda niun hende cas, garantisa salario 100% di acuerdo cu loke ta trah, mantene vakantieuitkering 100% y bonus di pasco di 200 florin mas. El a menciona tambe cu nan ta bezig cu CAO y nan trahando riba un protocol y e mandato aki ta pa e aña aki.

“Nos tin cu cera un protocol pa aña y ABV ta para hunto cu su miembronan. Nos a entrega diferente beneficio secundario y nos a vries e pensioen premie pa 2021 pero nos no por keda vries e pa mucho largo pasobra e ta bay na costo di bo mes. Pa 2022 nos tin cu recupera locual nos a vries den 2021 pasobra e ta werkgevers premie y werknemers premie. Locual nos a vries na 2021 nos ta haya na 2022 y locual mester a pasa na 2022 nos ta hay’e na 2023. Nos a duna tur di nos parti nos ta compronde e situacion nos ta trahando keto bay, pero esey ta e mandato cu nos a haya”, Maduro a indica.

Maduro a aclara tambe cu trahadonan di hospital a entrega 5.5% di nan salario di juni 2020 pa december 2020. Den 2021 nan a bay den entrega indirecto pasobra nan a scoge pa no mishi den salario pasobra esaki tabatin efecto devastador den hospital. “E tabata demotivante pa traha den pleno pandemia y entrega, e tempo ey un grupo grandi di trahado local a bandona hospital”, el a expresa.

Pa locual ta trata e memo cu a sali ayera tambe tocante pensioen premie di e trahadonan di hospital, el a splica cu loke nan a entrega di e pensioen premie di 2021 nan mester recupera na 2022. El a sigui splica cu locual e memo ta bisa ta cu nan a vries pensioen premie 2021, nan tin cu recupera 2022. Tin un acuerdo di CAO tambe di 2020 pa 2023, pero ora e recorte a bin y e pensioen premie mester wordo hisa, na 2021 yama reuniongeneral, trahadonan no tabata kier entrega 5.5% di nan salario y e ora a tuma e decision pa bay den e parti secundario, indirecto.

“Esey ta e memo. Aworaki na 2022 nos tin cu recuper’e back pero door cu e no a wordo reteni den salario ni di januari ni di februari e mester wordo haci den maart y pa e no cay e trahado pisa, ABV mes a bin cu e voorstel na mesa pa e no cay e trahado pisa den un solo shot pa kite un solo biaha, pasobra corda bon e tin cu bay retroactivo y e ora pa mei e sigui cana normal pasobra esey ta un condicion caba di CAO ta nos a par’e un rato, vries e pa un aña pa no mishi cu salario 100%”, Maduro a aclara.

Aworaki ABV ta wardando contesta di e CAO-team di hospital. ABV a entrega e mandato cu nan a haya for di nan miembronan y aworaki nan ta en espera di un contesta pa wak si nan ta bay di acuerdo cu e mandato of no.