No tin reduccion structural di gasto di personal, mientras cu gasto di producto y servicio ta aumentando
Minister di Finanzas no ta splica di con gastonan Gobierno no ta haci suficiente pa baha gasto di Gobierno, servicio/producto y personal structuralmente. Es mas, gobierno tabata deficiente den sigui consehonan di College Aruba financieel toezicht, CAft despues di e di tres reportahe di ehecucion (UR) pa 2021.
Esaki ta locual Presidente di CAft dr. Raymond Gradus ta bisa den su reaccion riba e di cuater reportahe di ehecucion di Minister di Finanzas mr. Xiomara Maduro. E reduccion di 12.6 porciento di salario y beneficio no mester ta e norma pa midi reduccion di gasto, pasobra e recorte ta un medida temporal y no ta algo structural.
Aruba a haya aprobacion di Conseho di Minister di Reino, basa riba conseho di CAft pa un deficit financiero di 598 miyon pa 2021. Pero ainda ta keda diferencianan den e acercamentonan kas benadering y e baten-lasten benadering. Asina mes e deficit tabata mas menos cu e maximo permiti, esta di 534 miyon. E entidadnan den sector colectivo a mira un surplus di 39 miyon, entre otro danki na ATA.
Di otro banda, tabatin un realisacion mas abou di entrada di belasting directo, 32 miyon, cu segun CAft tabata yamativo si compara cu 2020. Di otro banda e entrada di belasting indirecto a subi cu 25 porciento compara cu 2020
Gobierno no ta splica suficiente
CAft a ricibi e di cuater UR pa 2021 dia 21 di Februari 2022, aunke cu segun e ley, e mester tabata entrega pa mas tarda 15 di Februari. Aunke cu entrada di tarifa di importacion a recupera na 2021, e cifra na 7 porciento bou di locual tabata presupuesta. Locual si tabata mas halto ta e entrada di retributies, leges y derechonan y categoria di ‘otro entrada.’CAft ta bisa cu Minister no a brinda suficiente splicacion riba e detayenan.
Tin un aumento di gasto di 70 miyon florin na 2021 compara cu 2019, cu pa gran parti ta debi na e aumento di pago pa e proyectonan PPP, gasto di interes, servicio y producto y otro. E aumento di gasto di interes ta pa motibo di e bononan cu Gobierno a saca na 2020 na balor di 172 miyon florin a cambio di interes di 5.3 porciento. Tambe a mira un aumento di gasto di onderstand cu a cuminza baha na fin di 2021. Ta CAft ta conseha pa Gobierno enfoca riba control di gastonan den otro categoria cu no ta e interes y e asina yama tarifanan di disponibilidad ya cu esakinan ta fiho.
Gasto di personal
Gobierno no a implementa suficientemente e medidanan di e BVP, e Beleidsplan Verlaging Personeelslasten (Plan di Maneho Reduccion gasto di Personal), cu resultado cu no a concretisa e reduccion structural di gastonan di personal na 2021. E pago di overtime a subi na 2021, mientras cu e BVP ta papia di un reduccion. E gastonan di personal berdad ta menos cu 2020 y formalmente ta cumpli cu e norma presupuestario acorda cu Hulanda. Pero CAft ta bisa cu e reduccion ta resultado di e recorte di 12.6 porciento cu ta un medida temporal. Aruba lo no a logra e norma si compara e nivel di gasto di personal cu 2020, coregi cu e recorte di 12.6 porciento, segun CAft.
Locual ta mustra di e di cuater UR, ta cu e realisacion di gasto pa producto y servicio tabata mas abou cu presupuesta. Di otro banda, e ta substancialmente mas halto cu e periodo prome cu corona (2015-2019). CAft ta bisa cu e nivel di gastonan a aumenta drastico den presupuesto 2022 compara cu realisacion di 2021 y un biaha mas ta mustra riba e desaroyo preocupante di e gastonan.
Segun articulo 17 inciso 3 di e LAft, Aruba mester indica den e di cuater UR, den caso cu tin deficit den e sector colectivo, cua ta e medidanan cu ta bay tuma pa compensa esaki. E ponencia aki a keda confirma 29 di October 2021, unda a pidi Aruba alabes pa bisa den e di cuater UR aki, cu medida ta tuma pa compensa e deficit di 2020. Pero e di cuater UR pa 2021 no a bisa con ta bay compensa e deficitnan aki.
