(AP) – E prome persona cu a ricibi transplante di curason di un porco a fayece dos luna despues di e experimento, Maryland Hospital ken a conduci e operacion a anuncia diaranson.
David Bennett di 57 aña di edad a fayece riba diamars na University of Maryland Medical Center. Dokternan no a duna un causa exacto pa e fayecimento, pero si a comparti cu su condicion a keda empeora varios dia anterior. Bennet su yiu homber a elogia e hospital pa a ofrece un experimento, bisando cu e famia a spera cu esaki por a yuda e esfuersonan pa combati e escasez di organo pa transplante.
“Nos ta hopi gradici pa tur momento innovativo, tur sono loco, tur anochi sin drumi cu a ser inverti den e esfuerso historico aki,” David Bennett Jr. a bisa den un declaracion publica pa Univesity of Maryland School of Medicine. “Nos ta spera cu e storia aki ta e comienso di speransa y no e final.”
Dokternan tin varios decada caba ta busca manera pa algun dia usa organo di bestia pa transplantenan cu por salba bida. Bennet, ken tabata di Hagerstown Maryland, tabata un candidato pa e esfuerso mas recien solamente pa motibo cu e no tabata eligibel pa ricibi un transplante di curason humano pa motibo cu e no tabatin speransa di bida, no tabatin ningun otro opcion y tabatin mester di mashin pa por keda na bida.
