(CiberCuba) – Centanares di Cubano a presenta diaranson mainta dilanti embahada di Panama na La Habana protestando e medida reciente cu ta impone, por lo menos pa e proximo tres luna, e necesidad di un visa di transito pa tur Cubano cu yega e pais y den conexion pa otro destino of cu ta regresando Cuba.
Entre e manifestantenan cu a reuni dilanti e sede diplomatico tabatin personanan cu incluso tabatin pasashi cumpra caba pa e siguiente dia y aworaki nan no sa si nan por biaha.
Memey di momentonan di tension, cuerpo policial mester a desaloha hende alrededor di e embahada y a forma un barera pa impedi cu e multitud por yega na e entrada.
E anuncio di entrada na vigor inmediato di un visa di transito pa biaha pa Panama, anuncia diamars 8 di maart, a converti den un noticia hopi malo pa e Cubanonan cu den e ultimo lunanan a opta pa e nacion di Centro America como conexion pa nan vuelonan pa Nicaragua, pais cu no ta exigi visa na e ciudadanonan di e isla desde november 2021 y cu a converti den brug pa esnan cu ta desea di yega Merca crusando fronteranan.
E resolucion ta agrega cu e visa di transito lo wordo otorga te un periodo maximo di 24 ora y ta autorisa e migrante pa permanece solamente den e area di transito internacional di e aeropuerto, cu e meta pa por continua su biahe pa otro destino of pa su pais di origen.
E costo di e visa ta 50 balboa, ekivalente na 50 dollar Mericano y mester wordo solicita personalmente na e consulado Panameño di e pais unda nan ta biba, cu un tempo minimo di 15 dia prome cu e fecha di biahe.
