Den conexion cu preparacionnan pa celebra Aruba su Dia di Himno y Bandera, Comision Celebracion Dianan Nacional (CCDN) y Departamento di Cultura e tene un conferencia di prensa unda a informa ariba kico lo tin durante e proximo simannan pa locual ta trata e celebracion di nos dia nacional.

Presidente di CCDN, John Flemming, a indica cu despues di dos aña cu pueblo di Aruba no por a sali y celebra Aruba su dia nacional, e aña aki e actividadnan lo ta den full swing. E aña aki CCDN tin como lema pa celebracion di dia di Himno y Bandera “chikito y simpel bo por ta, pero si respeta”.

E celebracionnan pa dia di Himno y Bandera a cuminsa e weekend cu a pasa cu e festival ‘Un Canto pa Aruba su Himno y Bandera’. Diabierna 4 di maart tabatin e concierto cultural presenta pa Edjean Semeleer y su orkesta hunto cu diferente artista local ariba Plaza Betico Croes. E celebracion a sigui diasabra 5 di maart cu festival Un Canto pa Aruba su Himno y Bandera categoria infantil y hubenil, y diadomingo 6 di maart e weekend a termina cu e festival den categoria adulto.

“Nos por a mira cu despues di dos aña cu pueblo di Aruba no por a celebra nan dia, nan luna cultural manera semper nos a custumbra riba Plaza Betico, nos a mira un publico yen, tur hende a bin hopi contento y gosando di tur e tentnan cu tabatin cuminda crioyo, cos dushi, artesania y hopi mas”, Flemming a indica.

Pa locual ta trata e siguiente simannan, CCDN a anuncia cu dia 15 di maart lo tin e competencia Poeta di Patria den Cas di Cultura unda cu lo tin 15 participante. E aña aki e competencia Poeta di Patria ta wordo dedica na Sr. Atan Lee, den feliz memoria, ken ta e persona cu a inicia cu e competencia aki.

“Nos por bisa cu interes ta hopi grandi pa celebracion di dia di Himno y Bandera rond Aruba e aña aki, nos a haya peticion di hopi gruponan y clubnan cu ta organisa nan evento di 18 di maart”, Flemming a agrega.

Junior Arends, miembro di CCDN, a continua y a elabora ariba celebracionnan di dia 17 y 18 di maart. El a informa cu manera ta custumber, un dia prome cu dia di Himno y Bandera lo tin e manifestacion cultural ariba Plaza Libertador Betico Croes. Esaki ta manifestacion cultural caminda lo tin discurso di Minister di Cultura, Sra. Xiomara Maduro, y lo tin presentacion tambe di artistanan local tanto den baile, musica, poesia entre otro y e feria di tentnan.

E anochi lo termina cu presentacion di e artista local Ataniro, kende e aña aki ta celebrando 30 aña den mundo di farandula.

Arends a sigui splica cu riba dia di Himno y Bandera, 18 di maart, manera ta custumber lo tin e acto protocolar. Esaki lo cuminda pa 8:30 di mainta cu yegada di e mandatarionan y cinco pa nuebe ta ricibi su excelencia Gobernador di Aruba pa asina inicia cu e acto protocolar unda lo tin discurso di su excelencia Gobernador di Aruba como tambe di Minister President, Evelyn Wever-Croes.

“Lo tin un programa prepara unda lo tin coro di scol, grupo di baile, poeta di patria cu lo presenta. Un mainta bunita unda nos ta invita un y tur pa participa. Despues di esaki lo tuma luga e desfile y e aña aki esey ta bay gruponan uniforma y gruponan gubernamental uniforma”, Arends a agrega.

El a remarca cu manera ta custumber Minister di Cultura, desde cu el a asumi su responsabilidad, y CCDN lo percura pa materialnan educativo yega na scolnan. E aña aki, el a indica, manera a tuma luga pa Dia di Betico, lo tin un biaha mas un video special pa tur e scolnan preparatorio y basico unda lo enfoca ariba tres simbolo, e bandera, himno y escudo di Aruba.

E material aki tur docentenan por usa na scol pa sigui educa tur e muchanan ariba celebracion di Aruba su dia nacional. Arends a menciona tambe cu e mesun material aki lo wordo usa den e programa nobo cu a cuminsa e aña aki, “Kibra Coco”, den e edicion di Himno y Bandera.

Pa locual ta trata scolnan preparatorio e aña aki, danki na un comision forma pa maestro- y boluntarionan, a organisa e competencia “Un Rima pa Mi Isla”. Esaki ta un competencia pa tur scol preparatorio unda ta participa den klasnan. E reglanan ta lo siguiente. E rima mester contene cuater verso, e mester ta na papiamento, e mester expresa un mensahe relaciona cu Dia di Himno y Bandera. Tur klas di scolnan preparatorio por participa.

Pa participa e docente mester graba e muchanan bisando e rima y ta manda e video pa email di CCDN. Ultimo dia pa entrega e video lo ta diaranson 16 di maart. E klas ganador lo presenta e rima durante e programa “Kibra Coco” edicion Himno y Bandera y lo ricibi un premio tambe. Pa mas informacion por tuma contacto cu Departamento di Cultura.

Papiando di celebracionnan den bario, Arends a subraya cu manera ta custumber Ministerio di Cultura, Departamento di Cultura y CCDN ta sostene tur actividad den bario y encurasha tur persona of organisacion cu tin un actividad den bario pa manda informacion pa Departamento di Cultura pa asina por inclui e actividad den e calendario di celebracionnan di dia di Himno y Bandera.

Diasabra dia 19 di maart lo tin e programa “Kibra Coco” unda scolnan basico por competi y gana diferente premio.

Por ultimo, Arends, den nomber di CCDN a extende un invitacion na henter pueblo di Aruba pa celebra e dia nacional y participa na tur e actividadnan organisa. “Pueblo ban honra nos cultura, ban honra nos simbolo di identidad. Nos ta invita pueblo pa hisa bo bandera na cas, pone bo banderin na bo auto, cumpra bo t-shirt, usa bo materialnan pa asina demostra cu bo ta stima Aruba”, el a expresa.