Nos a tuma nota di e hecho cu, den e actual crisis mundial, cu prijs di crudo riba US$ 110 pa bari, ta recorda nos cu aña pasa no a hedge nada, pa preveni un alza den prijs di awa y coriente na nos isla. Aña pasa, na momento cu mester a considera cera un contrato di hedge nobo, no a haci esey. Tabata considera cu esey lo no ta necesario, y awor nos tin e sorpresa cu prijs di petroleo a bay pa cielo y por lo pronto, sigur si e conflicto arma na Ucrania no haya solucion, no lo baha tampoco.

No ta sorprende nos nada cu den e caso aki gobierno, accionista unico di WEB Aruba NV, no ta tuma responsabilidad pa esaki. Ora mester, segun nan, ta interveni directamente den e compania, ta kita y pone director segun gusto pa logra contrato dudoso di suministro di LNG. Pero ora ta trata responsabilidad pa duna maximo proteccion na nivel di prijs di consumidor, de repente ta e compania ta responsable. Esaki ta haci nos corda e tempo cu Aruba tabata parti di Antiyas ainda, unda ora seleccion di futbol perde, ta Antiyas cu representacion minimo di Aruba, semper tabata perde, y ora di gana, ta Corsou a gana. Pero, ‘then was then and now is now’. Nos no tin pakico di soporta e clase di wega aki cu lo bay costa e consumidor miyones, mientras cu nos por anticipa un inflacion fuerte caba.

Y anticipando e critica gubernamental cu sigur lo bin, cu e contrincante politico a haci peor den pasado recien cu e hedging, laga nos ta bon cla: e centenares di miyon cu a bay perdi ey ta un posible caso criminal cu nos no ta lubida. Sin embargo, ta parce cu e actual gobierno sí a lubida, pasobra unda e investigacion a keda cu mester a duna claridad den e asunto ey? Nos no ta lubida con e ministro encarga e tempo ey a prohibi e accountant cu a investiga yega na na nivel di su ministerio, asina cu e decisionnan clave den e asunto a keda den scur y a devalua e investigacion, nos ta supone a proposito, kedando sin conclusion cu lo a toca e ministro. Awendia e ministro ta parlamentario atrobe y ta critica sin tuma na cuenta e manteca cu e tin riba su cabez. Pero, ta mas di cuatro aña, bayendo cinco, di otro gobierno, y no a haci nada al respecto?

Ademas, e eventual argumentonan pa no hedge aña pasa, ta sumamente cuestionable. Un vistazo riba cualkier website di petroleo cu ta duna resumen di e ultimo aña(nan) di prijs internacional, ta duna cu prijs di crudo casi nunca a baha bao di US$ 50 pa bari denultimo 5 aña. No ta requeri tanto informacion pa sabi cu durante e ultimo añanan tabatin un esfuerzo sosteni di e paisnan organiza den OPEC, hunto cu Rusia, pa mantene produccion di crudo limita pa e prijs no cay mas pa via di e poco demanda durante e slump economico. Es decir, warda riba un mihor momento pa hedge lo tabata un locura, y awor nos ta mira resultado di e actuacion dudoso ey.

Otro asunto cu a capta nos atencion ta e iniciativa gubernamental cu un nomber atractivo ‘Trash2 Cash’. Yega na un nivel maximo di reciclahe di desperdicio, y gana placa como empresario cu esaki, ta algo cu nos mester ta haciendo pa hopi aña caba. Es mas, nos tabatin intento caba di varios pa haci exactamente esey, y kico realmente tabata e apoyo cu nan a haya di e distinto gobiernonan den ultimo dos decada? E problema cu ta bay bin cu e proyecto aki, cu riba su mes ta positivo, ta e confianza cu mester tin pa abo, como empresario, bay defende o propaganda bo iniciativa dilanti gobierno, y confia cu nan no ta duna bo ‘nul op het request’ pa despues ripara cu un di e ‘Famia’ ta bay haya permiso pa exactamente e mesun proyecto ey? Ta dificil pa nos kere cu tin empresario asina ‘naief’ pa bay aporta idea na gobierno y keda finalmente man bashi pasobra gobierno ta atende asunto di famia y amigo como prioridad. Un biaha mas: e idea mes ta bon, pero realidad di e bida economico corta na dos pa e realidad politico berde/geel ta menaza di daña tur cos. Si acaso ta desea di haci e cos aki na un manera honesto y transparente, gobierno mester inicia un proyecto di sosten na e sector aki di procesa desperdicio, unda tin criterio y proceso publica transparentemente, cu no ta termina den desbentaha pa tur esnan cu no ta liga na actual gobierno. Crea y mantene un ‘level playing field’ ta un obligacion y tarea primordial di cualkier gobierno. Nos sa cu tin legislacion na caminda pa garantiza mayor competencia leal den comercio, pero esaki no ta un area cu e ley ta bay cubri. E ley lo bay atende competencia entre compania den cierto sector, pero lo no toca e proceso desleal cu ta tumando lugar den gobernacion na fabor di esnan cu ta liga na partido y gobierno. Ta aki nos ta fayando creando legislacion pa gaña cumpli, mientras no ta mishi cu e deshonestidad di nos sistema politiza, y ta sirbi como ‘taparabo’ pa continua sistema di faboritismo politico.