E desaroyonan cu ta tumando luga entre Rusia y Ukraina durante e ultimo simannan, sigur tin efecto directo y indirecto riba diferente otro pais. Considerando esaki, Gobierno di Corsou tambe na su turno a tuma pasonan pa por analisa e situacion mas di acerca y lo sigui pone atencion continuamente riba e posibel efectonan cu e situacion aki por trece pa Corsou.
Den e siman tras di lomba, Prome Minister Gilmar Pisas a tene diferente reunion cu instancia y autoridadnan cu conocemento di e materia pa asina ampliamente analisa e situacion di tur angulo y tuma pasonan na tempo si esaki ta necesario.
Diabierna ultimo, 4 di maart, prome minister a bolbe reuni cu representantenan di Defensa/Marina Real, Directorado di Control di Riesgo y Maneho pa Calamidad (DRR), Veiligheidsdienst Curaçao (VDC), Directorado di Relacionnan Exterior (DBB), Cuerpo Policial Corsou (KPC), Interpol, Ministerio di Desaroyo Economico (MEO), Directorado di Comunicacion y Informacion (C&V) y conseheronan di Prome Minister.
For di e reunion aki a conclui cu na e momentonan aki Corsou por ta trankil y cu no tin motibo pa drenta panico y of tuma ningun tipo di medida al respecto. Pa loke ta trata ehercicionan militar cu normalmente sa tuma luga den nos areanan, Gobierno di Corsou ke retira cu esakinan no a keda escala na niun momento. Memey di situacionnan manera esaki ta keda importante pa, apesar cu e desaroyonan andando no tin efectonan directo pa Corsou, nos comunidad por sigui mantene su mes bon informa.
Gobierno di Corsou ta bay sigui monitorea e situacion hopi di acerca y lo sigui tene contacto regularmente cu tur instancia y/of personanan concerni. Den e trayecto akí, Gobierno lo percura pa sigui tene nos comunidad tambe informa continuamente. Pronto, Gobierno lo comparti informacion mas amplio y profundo entre otro riba e topico di sanshonnan cu recientemente a keda impone riba Rusia y dicon Corsou tambe automaticamente mester forma parti na esaki. Tambe, lo informa comunidad tocante e efectonan economico cu e situacion entre Rusia y Ukraina ta ocasiona pa mundo y kico esaki lo bay nifica pa Corsou.
