Camara di Comercio no ta mira nada di simplificacion di belasting den proposicionnan di reforma

E ta mustra mas un ehercicio pa haya mas entrada sin cu ta duna bista con ta bay baha gasto publico

E reforma di belasting a mustra mas bien un ehercicio pa subi entrada di Gobierno sin cu ta duna claridad con Gobierno ta bay baha su gastonan. En todo caso, locual a mira te awor no ta un simplificacion di e sistema di belasting, pero net lo contrario.

Asina Mr. Monica Kock, Presidente di Camara di Comercio a interpreta e presentacionnan cu a ricibi di DIMP riba e plannan di reformacion di sistema di belasting.

Camara di Comercio tabata un di e organisacionnan cu tabata permiti pa haya sesionnan informativo di DIMP riba e plannan pa reforma. Lo tin mas sesion pa bay den profundidad, pero “e informacion cu nos a ricibi ta papia di reforma pero ta mustra mas tanto cu e ta un ehercicio pa genera mas entrada, pa por paga e deficit. Loke nos kier wak di banda di Gobierno, ta con lo baha e gastonan. Situacion ta dificil pa pueblo y nos tur, y no ta asina cu nos mester paga e diferencia pa cubri e gastonan publico.”

Monica Kock a bisa cu no a tarea di DIMP di pa presenta un plan di reduccion di gasto. Pero esey ta algo cu tur organisacion di empresario, ATIA, CUA, AHATA y Camara di Comercio kier wak banda di e plannan di reforma di belasting, pa asina por delibera riba e informacion ricibi y por formula pregunta pa e asina yama ‘break out sessions,’ esta e reunionnan durante cual realmente lo intercambia pensamento. Pa por bin cu sugerencianan mester tin e imagen completo y e reformanan riba nan mes no ta brinda esey.

No tin simplificacion

Riba su mes, tur hende ta de acuerdo cu un BTW como belasting indirecto. “E idea di e reformanan tabata pa simplifica nos structura di belasting, di directo pa indirecto. Pero nos no ta mira esey. No tin mucho cambio den e proposicionnan. Nos ta mira cu e ta djis un forma pa genera mas placa. Ta elimina BAVP, BAZV y cambia pa un BTW y esey no ta un cambio. Y no ta kita ningun otro ley di belasting cu ta algo cu normalmente mester haci ora cu ta bin cu belasting indirecto.” Asina ta papia e tarifa di importacion y hasta e aumento di e belasting di turismo, toeristenheffing cu a subi di 9.5 pa 12.5 porciento y asina tin diferente aspecto cu a duna comentario cortico. Corda cu tur esakinan ta reaccion riba informacion cu nos a ricibi e momento cu DIMP a presenta su plannan. Tur esakinan ta e prome reaccionnan.”

Cuadro financiero

DIMP a bisa Bon Dia Aruba cu e porcentahe di BTW no ta determina ainda, aunke cu Camara di Comercio tambe a haya e mesun informacion cu Grant Thornton a ricibi esta cu esaki lo ta 18 .5 porciento. No a presenta e cuadro financiero di diferente proposicion sino mas bien a duna un splicacion kico BBO y su cadenanan (schakel) ta y kico ta BTW. “Pero esey riba su mes ta djis splicacion di e belasting. Nos a puntra con nan a yega na e calculacion di 18.5 porciento y kico ta e proyeccionnan ta, pasobra nan ta informacion importante. Nos tin hopi aña ta bisa cu Gobierno mester baha su gasto. Nos kier mira e pida ey cu ta cardinal na momento cu ta hisa belasting.”

No ta stimula inversion

Camara di Comercio no ta kere cu e proposicion di baha e porcentahe di belasting riba ganashi, e winstbelasting cu 3 punto, di 28 pa 25 porciento ta algo cu ta bay stimula inversion. Es mas, IMF mes ta sugeri pa baha e porcentahe te na 20 porciento. “Na mesun momento ta elimina e deduccion di inversion, e asina yama ‘investeringsaftrek.’ Con bo kier pa hendenan inverti si ta kita e beneficio ey. E ora ey, hende local y stranhero por dicidi cu nan no ta inverti na Aruba. Y si no tin inversion, economia no ta sigui draai.” Den otro palabra, e proposicionnan di DIMP no ta algo asina simple. “Nos ta hopi curioso pa mira e specificacionnan den e sesionnan cu nos lo atende. Esey lo duna nos miho indicacion con a yega na e conclusionnan cu nan tin,” mr. Kock a bisa.

Baha gasto

Pa e organisacionnan comercial, Gobierno mester mustra con e ta bay baha su gastonan. No ta cuestion ta gremio comercial ta dicidi pa manda hende cas. Gobierno ta esun cu mester dicidi con e ta baha su gasto. “Pero un di e exigencianan di e landspakket ta cu mester baha gasto di personal y esaki por sosode ta baha salario of manda hende cas. Esey ta e dos maneranan. No ta intencion pa kita hende y manda nan riba caya. Pero falta hende den otro sector y mester bin un plan di transicion pa por reeduca personanan cu ta perde trabou pa drenta e sector cu mester trahado awor cu ta esun hotelero. E no ta bay di su mes y mester gui’e. E no ta facil. Pero ta un dia mester pasa den e reorganisacion di sector publico, mescos cu cualkier negoshi. Hopi negoshi mester a reorganisa particularmente pa motibo di e pandemia y Gobierno tambe mester haci e ehercicio ey, en bes di djis bisa cu nos tur mester paga mas belasting.”

No tin tempo

Camara di Comercio ta preocupa tambe pa e poco tempo cu tin pa introduci e cambionan di belasting. “Realidad ta cu nos ta confronta y ta spera di nos cu ta duna nos contribucion riba e tema aki den un termino cortico, mientras cu Gobierno tin lunanan ta trahando e reformanan. Pa comercio e ta bira hopi dificil si no sa kico e sistema ta bay bira y con mester adapta administracion y e consecuencianan di dje. Particularmente si ta dicidi cu tin dos tipo di porcentahe di BTW cu ta haci henter e proceso mas complica ainda,” Kock a sigui splica.

Manera ta conoci, DIMP a propone un tarifa abou di seis porciento di BTW riba cuminda y bebida no-alcoholico. “Un suma fiho, un ‘flat-rate,’ ta mucho mas facil pa maneha compara cu un sistema cu diferente porcentahe. Pero tempo ta hopi cortico y nos a trece dilanti cu falta nuebe luna pa introduci e ley y ta awor nos ta cuminza haya informacion. Pero e informacion ta djis un splicacion di e BTW, pero no detayenan.”

Ainda no ta compronde BBO

Como tal, ainda mester haya e detayenan pa por bin cu un punto di bista mas concreto. “Den pasado Gobierno mes a bisa cu pa trece cambio den e codigo di belasting e ta rekeri 18 luna pa dos aña pa por implementa. Mester realisa cu BBO tin 15 aña vigente na Aruba y e cumplimento ainda ta cana atras, segun mr. Kock. “Nos a compronde cu si ta cumpli cu BBO, Gobierno lo haya 30 miyon mas den caha. Pero awor kier bin cu un belasting mas complica, y ta kere cu den un par di luna, tur den comercio ta bay compronde con e sistema ta traha, mientras cu te ainda, despues di 15 aña, ainda tin ta bringa pa compronde e BBO.”

E Presidente di Camara di Comercio ta enfatisa cu economia di Aruba ta depende grandemente di negoshinan mediano y chikito, cu no tin e capacidad financiero pa busca asistencia di specialistanan pa yuda nan implementa e codigo di belasting nobo. “Ken ta bay splica nan esaki? E ta bay tuma hopi tempo pa splica. Y no ta cuestion di pasa e ley dia 28 di December y kere cu pa Januari 1, 2023, tur hende na Aruba ta compronde. Mester haci un campaña di informacion hopi grandi. “Ban ta honesto, BBO tin 15 aña y te ainda e cumplimento no ta halto,” ta e conclusion di e Presidente di Camara di Comercio.