Parlamentario Marco Berlis (MEP): Pa awor un fusion entre HOH y IMSAN ta ‘off the table’!

For di basta tempo caba ta conoci cu director di HOH sr. Jacco Vroegop ta buscando pa fuseer HOH cu Imsan. Tampoco ta desconoci cu director di Imsan Drs J.R.Rajnherc ta completamente encontra di esaki. A scucha e argumentonan di ambos director recientemente den Parlamento di Aruba y tur cos ta mustra cu nan ta di acuerdo pa un mihor cooperacion entre HOH y Imsan, sinembargo fusie no ta un opcion pa Drs J.R.Rajnherc. Esaki tampoco ta un noticia nobo.

En bista di e situacion aki, ayera a reuni cu minister sr. Dangui Oduber riba e caso aki. Durante e reunion aki a puntra minister si ta existi un rapport cu datonan financiero detaya riba e beneficionan, obstaculonan y placa cu lo spaar si acaso lo tin un fusie entre HOH y Imsan. Minister a informa nos cu lo laga haci un onderzoek di esaki. Sinembargo el a enfatisa cu loke ta papiando riba dje aworaki no ta un fusie sino un cooperacion mas estrecho entre HOH y Imsan cual lo aumenta e eficiencia y lo yuda tambe spaar placa.

Ademas di esaki minister Dangui Oduber a subraya cu e tin un MOU cla, cual lo por seya e cooperacion aki entre HOH y Imsan formalmente. Awor lo keda pa ambos director ricibi y studia e documento aki pa asina cuminsa negocia e contenido di e cooperacion aki. Minister tambe a bisa cu director di HOH ta papia di fusie pero no tin ningun rapport cu por onderbouw ni hustifica esaki cu cifras. Pa aworaki fusie ta “off the table.”

No ta desconoci tampoco cu no ta tur ora fusie ta funciona y ta beneficioso pa esnan cu ta purba haci esaki. Sigur ta bon pa menciona tambe, cu den e Landspakket cu Gobierno a firma no tin ningun caminda skirbi cu HOH y Imsan mester fuseer. Loke landspakket ta papia cla di dje ta, cu mester bin un cooperacion mas estrecho entre Hospital y Imsan. E pregunta ta e ora, pakico sr.Vroegop ta desea e fusie asina tanto si no tin ningun rapport ni onderzoek traha pa duna claridad riba un decision asina grandi? Mi ta di opinion cu esaki sigur no ta un tempo cu nos lo kier wak decisionan haci con cu ta. Nos ta den un crisis y loke nos mester awor ta stabilidad, servicio y eficiencia.

Recapitulando, awor loke ta riba mesa ta un MOU pa crea un mihor cooperacion entre HOH y Imsan. Como Parlamentario mi ta contento di wak e desaroyo aki y cu nos por cumpli tambe cu e landspakket. Sigur un bon cooperacion entre e HOH y Imsan lo empodera ambos lugar pa duna un mihor servicio y minimalisa nan gastonan cual ta trece beneficio pa nos tur!