Nos grandinan ta bisa, ‘no haci algo awe, cu lo bo lamenta mañan’ of ‘sopi pura ta sali salo’. Kico ta e consecuencia pa nos na Aruba, Caribe, Hulanda, Merca? Cu tur respet mi kier a dirigi mi mes na nos flamante excelencianan Minister Sra. Evelyn Croes y Xiomara Maduro.

Mi ta admira boso forza como hende muher, mi ta admira boso curashi como hende muher pa maneha un pais hunto cu e hombernan den nan respectivo ministerio. Pero mi ta hopi disgusta di e decision cu a tuma y probablemente tin ‘atrobe’ un mal imagen na nos pais Aruba, no pa Turismo, sino den e maneho gubernamental, den e decision cu a tuma. Ora bo ta ehecuta un trabou riba nivel nacional y internacional, bo mester sa kico ta pasa na bo pais y rond mundo. Como gobernante bo mester por sa pa duna ehempel, ta un ehempel, ‘walk your talk’ esta cumpli cu loke bo ta propone.

Comunidad y ATA
Canando den nos comunidad constantemente, combersando cu diferente persona, monitoreando loke ta pasa nacional e internacionalmente mi ta traha e comunicado aki pa trece na atencion con cosnan por a bay diferente y asina evita loke ta pasando na es momentonan aki. Nos comunidad ta rabia, hendenan no tin entrada, mi ta comprende cu ta desea pa asina e tiendanan cu tin productonan di carnaval of di bandera por haya tambe nan entrada pa esaki. Mi ta comprende tambe cu papiando cu tiendanan cu antes tabata haya entrada pa motibo di carnaval y ultimo añanan esaki NO ta e caso pasobra ta wordo importa di afo pa varios motibo. Mi ta comprende tambe nos musiconan mester di entrada extra, pasobra mi mes ta combersa cu algun di nan y nan a acerca mi tambe.

Keda pusha algo cu no ta faborabel den e temporada of e aña aki NO ta un bon decision. Entrada di Aruba Tourism Authority por a warda un poco y educa pueblo di e pasonan cu financieramente tin cu wordo haci. Ta obvio cu e % cu a wordo kita pa motibo di crisis, por lo pronto no lo wordo debolbi. Nos ta bayendo den rumbo di un paro general atrobe, gremionan, gruponan ta lantando pa mustra nan malcontento y no ta e momento pa gasta e 100mil den 1 dia y sigur no si gruponan grandi di Carnaval manera Champagne of T.O.B., y otronan cu por a lanta y no por ta parti di dje e aña aki pasobra no tin manera pa participa, bo ta creando mas depresion ainda!

Inversion
Diferente actividad rond y creatividad cu ta saludabel, baile, arte, entrenamento, gymnastiek, haci actividad den area publico y habri mientras e situacionnan aki lo ta bahando. Mirando atrobe e 200 casonan cu a registra ta haci cu nos mester mira e importancia di e bida di e ser humano. Loke ta haciendo ta tentacion pa hende bay den Carnaval pa e siguiente dia lanta malo atrobe. Nos economia NO ta bezig ta draai 100 porciento, nos hendenan a perde trabou y ta na cas, otronan ni ta sali di cas pasobra gasolin a subi y ta spaar esaki, otronan no ta sali aporta manera antes na nos economia. Minister di Turismo Sr. Danguillame Oduber a publica cu Turismo ta subiendo, pero atrobe e poder di compra no ta manera antes.

Rusia y Ucrania
Mi a papia di e situacion di guera cu ta existi actualmente entre Rusia y Ucrania, cu un invasion Ruso tumando luga. Pakico primeramente esaki? Nos crisisteam a prepara nos pa si tin temporada di crisis atrobe cu lo bin pero den otro forma y ainda bo no ta wak esaki? Nos hendenan no por ‘afford’ e pobreza cu nan lo drenta den dje. Por ta consciente y informa nos pueblo cu Venezuela su debenan ta wordo maneha pa Rusia y China, maske Venezuela ta vincula cu Spaña? Venezuela debe mas cu minimo di $100 biyon na creditornan den exterior, incluyendo China y Rusia. Kico ta e consecuencianan pa nos? Por ta consciente di e consecuencianan cu tin pa nos pais cu ta ni 10% di Venezuela? Amplia e conocemento y traha mas di cerca cu otro ministerionan vooral cu Husticia. Nos ta consciente cu paisnan Europeo, Merca y otronan tambe ta preparando pa situacion cu por start na cualkier momento? Bo a ripara e mobilisacion di mas Hulandes Militar riba nos isla cu normal segun añanan ta pasando? Bo ta ripara cu nos polis, of yama nan nos autoridad local, mester upgrade nan mes pa asina tambe por ta prepara pa cualkier crisis atrobe? No ta pornada mi ta enfatisa riba “UN ARUBA”

Sancion pa Aruba
 Kico lo significa gastonan irreparabel, gastonan na un momento menos indica pa haci. Tratadonan internacional cu a wordo haci cu Nacionnan Uni y Aruba como miembro di e ILO cual ta e internacional Labor Organization por yega asina leu di duna Aruba sancionnan na nos pais…’cu esaki no a pasa caba of ta pasando’. Riba nivel nacional nos ta mustra cu tur cos ta bon, pero ta hopi ta e casonan cu bo no ta scucha of no ta yega na horea di e Ministerionan pa nan por sa kico en realidad ta pasando. Papia cu pueblo kico ta e sancionnan cu por bin pa Aruba, cu decisionnan cu por afecta no solamente Gobernacion sino NOS TUR!