(infobae) – Durante dianan festivo di 28 di februari y 1 di maart, a registra na Uruguay entre 70% y 90% di ocupacion na hotel, segun minister di Turismo, Tabare Viera.
Viera a señala cu e cifranan aki ta refleha un ‘tonico di recuperacion slow’, segun La Diaria a informa. A pesar cu e Camara Uruguayo di Turismo (Camtur) y e Sindicato Unico Gastronomico y Hotelero di Uruguay (Sughu) a festeha loke a sucede durante e cuatro dianan aki, tambe a adverti cu no ta suficiente pa ‘compensa’ un temporada di berano cual nan a defini entre ‘malo’ y ‘nefasto’.
E movemento tabata, entre tur, di turismo interno. Viera a agrega cu e informenan cu el a ricibi di camara y operadornan turistico ta indica cu ‘tin zona cu 70%, 80% y 90% [di ocupacion], sobre todo den dianan festivo; esaki ta inclui e zona termal, Colonia y oriente di e pais’.
A pesar di e cifranan aki di e recuperacion slow di cual e minister a papia, ‘for di diaranson ta baha considerablemente e reservanan, cu ta bolbe na 30% di ocupacion’ en promedio.
Presidente di Camtur, Marina Cantera a declara cu na Carnaval e dianan tabata bon na casi tur destino, sobre todo esnan na costa. Den e sentido aki, e departamento di Colonia, den occidente di e pais y un di e centronan turistico mas concuri, ‘ta e unico departamento cu ya a entrega na nos e cifranan di ocupacion hotelero, tabata mas di 80% di ocupacion, esta, e cifranan ta bon. Nos ta compronde cu tur destino ta bay ta entre 60-80% di ocupacion’.
E ‘rebound’ ta debi na, segun Cantera, cu ‘e situacion di turismo na e momento aki ta fluctua compañando e curvanan di e casonan di Covid-19’ y debi na ‘e situacion sanitario, awe, ta e gran responsable di e situacion den sector turistico’ pa motibo di un reduccion den cantidad di caso nobo pa dia di Covid-19.
