(NLTimes) – Durante un reunion na Den Haag den februari, GroenLinks su lider Jesse Klaver a declara cu aproximadamente 63,000 cas na Hulanda ta bashi.

Como solucion pa e problematica aki, el a sugeri un impuesto pa esaki, compara cu e impuesto imponi na Vancouver, Canada. Na e pais e impuesto aki a reduci e vacatura di cas cu 25 porciento. Investigacion conduci pa ANP, Nieuwscheckers y Pointer a comproba cu Klaver su comentario y declaracion ta corecto y basa riba hecho.

Dia 20 di februari di e aña aki, GroenLinks a organisa un reunion na Den Haag tocante e crisis di vivienda. Den e anticipacion pa e eleccionnan local, varios partido a organisa reunion pa trata problemanan social importante. Jesse Klaver a papia na Den Haag. “Tin un cantidad sumamente grandi di vacatura. Na Hulanda, mas o menos 63,000 cas ta bashi,” el a sigui conta. E lider di partido GroenLinks a ilustra e magnitud di e problema cu un comparacion. “Esaki ta practicamente manera cu si henter e municipalidad di Leeuwarden keda sin ta habita pa mas di un aña, y e pio ta cu esaki ta tumando luga mientras cu tin un gran cantidad di persona cu ta buscando un cas pa biba. Segun GroenLinks, e solucion pa e problem aki ta un impuesto pa vactura. “Ya caba nos sa cu esaki ta funciona, e ciudad di Vancouver a implementa esaki pa 3 aña, y como resultado e vacatura di cas a baha cu 25 porciento.”

Statistics Netherlands a publica e National Vacancy Monitor dia 26 di november den aña 2021. Esaki a provee mas informacion tocante e vacatura di casnan y otro edificionan na tur municipalidad, districto y bario na Hulanda. Segun e figuranan aki (calcula dia 1 di januari den aña 2021), 63,170 cas na Hulanda tin un aña bashi. Otro datonan di Statistics Nederland a demostra cu e municipalidad di Leeuwarden tabatin 63,067 cas dia 1 di januari 2021, cual ta demostra cu e comparacion ta corecto.

Vancouver a introduci e Empty Homes Tax, cu e meta di combati problematica di vivienda y stranheronan cumprando propiedadnan den e pais den aña 2017. Durante su introduccion, e doñonan di cas mester a paga 1 porciento di impuesto riba casnan cu ta bashi. E impuesto actualmente ta na 3 porciento. Un reportahe tocante e efectonan di e implementacion di e impuesto aki den december di 2021 a demostra cu e cantidad di casnan bashi a baha cu 26 porciento entre 2015 y aña 2020.