Recientemente e recursonan marino cerca di nos isla a haya bastante atencion cu e publicacion, no di banda di gobierno, di e rapport di e institucion di investigacion Carmabi. E rapport aki a trata e problemanan den awa na costa, pa e.o contaminacion y efecto di esaki y di cambio di claima riba bida marino cerca di costa. Y tambe a trata e situacion pa loke ta pesca na un manera responsable. Esaki no ta un luho pasobra e menazanan ta grandi, manera un otro rapport cu Bon Dia Aruba a ricibi tocante e situacion di calco na nos costa, tambe a mustra.

Loke e rapportnan menciona no a toca – pasobra tabata fuera di alcance di nan tarea di investigacion – ta e situacion y posibilidadnan di e awanan teritorial y mas leu ainda, e Zona Economico Exclusivo, cu ta yega na 200 miya panort di Aruba. Esey lo por ta obheto di otro investigacion, pa evalua e situacion di bida marino, y cu enfasis special riba recurso cu por ta base pa actividad pesquero na un nivel mas industrial.

Den pasado, tanto na 2016 y na 2017 den e Editorial aki a dedica atencion na e tema aki caba, y por constata cu den ultimo añanan no tabatin ningun novedad riba e tereno aki. E asombro di cierto hende e tempo aya tabata cu nan tabatin e impresion, eroneo, cu e zona tabata caba di Aruba, loke no tabata, y te awe no ta e caso. E zona exclusivo ta pertenece ainda na Reino, cu e posibilidad di bira di Aruba. Pero pa haci esey lo mes sucede algo. Dicon? Un splicacion breve.

Na december 1982 Reino Hulandes a firma e tratado di Nacionnan Uni, yama United Nations Convention on the Law of the Sea, na Montego Bay, Jamaica). Den esaki tin regla e asunto di derecho encuanto zona exclusivo economico, cu ta e.o. derecho di pesca, recurso den awa y den subsuelo di e teritorio (gas, petroleo, p.e.). Esaki ta significa cu derecho y debernan cu ta surgi di e tratado aki ta cay riba esun cu a ratifica, Reino, tanten no pasa esaki pa e islanan. Eseey ta implica cu e islanan concerni ta asumi responsabilidad pa e parti di lama cu ta cay pa nan pais.

Antiyas Hulandes a introduci un ley na maart 2007, yama Landsverordening Maritiem Beheer, cu ta regla pa nan teritorio e derecho y debernan di e tratado. Cu esaki na lugar di Reino, e islanan a bira doño di e derechonan bao di e tratado, pero a bira responsable tambe pa e obligacionnan. Aruba no a sigui ehemplo di Antiyas na 2007 y no a traha un ley similar. A bin cu un ley riba exploracion di gas y petroleo, pero e asunto di e zona economico exclusivo no. Pakico a laga e asunto aki tira un banda, ya cu si e exploracion pa gas di Repsol a duna resultado, nos lo a ripara di mal manera cu nos no tabata doño…?

E trabao legislativo no ta tanto pasobra nos tin e ehemplo di Antiyas, cu e obligacion semper pa mantene concordancia entre nos leynan y esunnan na e otro islanan y na Hulanda. Ademas e no mester ta someti na controversia politico, e ta algo di interes general. Nos ta kere cu tin otro motibo pa no regla e asunto aki. Como nunca tabatin ningun pronunciacion oficial riba e tema aki, ni pro ni contra, nos no por referi tampoco na algo asina. Esey ta haci cu nos ta keda cu e pregunta si no ta hacie pasobra e no ta un prioridad, o no ta hacie pasobra…, y aki speculacion por cuminza, aunke nos por pensa riba algun consideracion pa cual gobierno(nan) na Aruba no ta tuma e paso di pasa e ley.

Por ta cu ta considera e bentahanan, propiedad di recurso den awa y den subsuelo, no suficiente atractivo pa compensa e obligacionnan bao di e tratado. No ta trata solamente di e obligacion di raporta, pero e obligacion pa vigila diferente asunto den e zona. Por ehemplo e comportamento debido den e zona di embarcacion di cualkier nacion cu no ta cumpli cu regla, por ehemplo di dump material toxico, o deshaci di embarcacion bieu den e teritorio. Tambe viola regla estableci pa pesca pa e pais cu ta asumi responsabilidad pa e teritorio ey. Ademas vigilancia contra otro actividad delincuente, manera transporte y trasbordo di droga dentro di e teritorio. Ta en berdad un responsabilidad bastante grandi pa asumi, cu ta bay costa basta recurso, cu na e momento aki, y pa varios aña, no ta disponible. Nan ta bira disponible solamente, manera ta e caso pa hopi otro cos, si bin un reforma drastico den gasto di personal di gobierno, pa haci posible asumi e responsabilidadnan riba lama, cu di otro banda por genera empleo pa persona cu e preparacion debido, loke por considera un bon inversion.

Por ta cu nos politiconan ta satisfecho cu contempla loke por haci den e zona di 12 miya (awa teritorial) y ta prefera di laga vigilancia, y gasto corespondiente, pa cuenta di Reino? Si esey ta e caso, pakico no ta expresa esaki ‘de una vez por todas’, pasobra regularmente nos ta topa cu hende cu ta kere cu e ta di nos caba…