(NLTimes) – E boter di 3 liter di Moët & Chandon Ice Impérial champagne por ta contamina cu droga fuerte MDMA, tambe conoci como ecstasy e autoridad Hulandes pa cuminda y producto pa consumi NVWA a reporta.
Mishi of bebe e champagne contamina cu ecstasy te cu awo a causa 4 caso di malesa na Hulanda, y 7 caso di malesa cu 1 morto na Alemania, NVWA a declara. “Drenta den contacto cu of bebe e contenido di e boternan aki por ta mortal.”
Fabricante Moët Hennessy a informa NVWA di e problema aki recientemente. No ta conoci te ainda con e MDMA a drenta e boternan, causando cu NVWA no por calcula cuanto di e boter nan aki ta den circulacion. Tambe ta posibel cu otro boternan di e mesun marca ta contamina cu MDMA, NVWa a bisa.
E Autoridad a haci yamado na residentenan Hulandes pa keda alerta na e boternan di 3 liter di Moët & Chandon Ice Impérial champagne cu e codigo LAJ7QAB6780004. E codigo por ser haya patras di e boter. Si e contenido di e boter ta mustra inusual, no consumi esaki ni laga esaki drenta den contacto cu bo persona.
Champagne contamina cu MDMA no tin mesun cantidad di bubbles, tin un color bruin-cora cu ta keda bira mas scur, y por hole manera anise. Si bo tin preocupacion cu e boter cu b o a cumpra, no mishi esaki. “Te hasta bebe untiki pa purba e likido ta suficiente pa causa problema di salud. Un slok chikito por ta fatal,” NVWA a declara.
