(DiarioLibre) – Comite pa Eliminacion di Discriminacion contra Hende Muhe di ONU ta lamenta e maltrato cu e migrantenan Haitiano femenino ta sufri, door di cual a pidi e pais pa tuma medidanan pa mehora e situacion di e grupo aki.
E comite a denuncia e deportacion di gran cantidad di muhenan Haitiano na estado of poco despues di haya yiu, como tambe violencia y discriminacion contra nan of e separacion di nan yiunan den caso cu nan a nace den teritorio Dominicano.
E comite di Nacionnan Uni a pidi pa Republica Dominicana suspende inmediatamente e deportacion di e muhenan aki y garantisa nan proteccion di violencia y discriminacion.
Nan a solicita tambe e expedicion di permisonan di residencia permanente na e migrantenan cu nan yiunan a nace den teritorio Dominicano.
E informe ta denuncia diferente formanan di discriminacion contra e muhenan di origen Haitiano, por ehempel e riesgo grandi cu nan ta core di cay den rednan di trafico sexual.
E comite ta expresa di otro banda su preocupacion door di e hecho cu na 2020 solamente a procesa na Republica Dominicana 22 caso di rednan di prostitucion ilegal, y pa e cantidad halto di hobennan Dominicano cu ta wordo explota sexualmente.
