Diasabra anochi a tuma luga e Parada Nacional di Luz 2022 organisa pa Gobierno di Aruba hunto cu Departamento di Cultura. Despues di casi dos aña cu no tabatin actividad di carnaval, of di e magnitud aki, pa motibo di e pandemia, Gobierno a dicidi di organisa e parada aki como parti di nan exit strategy, como antesala pa celebracion di himno y bandera, y pa cende e mecha pa carnaval 2023.

Mirando e situacion actual y cu apenas luna pasa Aruba a sali di un di cinco ola di Covid cu a kibra varios record pa motibo di e variante Omicron, e anuncio di e parada aki a trece opinion mixto den comunidad. Pero a pesar di esaki, diasabra anochi e gruponan di carnaval a subi caya y mester remarca cu e ambiente di carnaval tabata presente y hopi ciudadano a sali pa presencia y disfruta e anochi.

E parada a cuminsa cu un discurso di Minister di Cultura y Finanzas, Xiomara Maduro, y Minister di Turismo y Salud Publico, Dangui Oduber, sigui pa un presentacion di e grupo RCC Aruba cu a representa Aruba na e Festival di Circo na Budapest y a logra tercer luga.

“E anochi a yega pa locual ta bira nos parada nacional di luz y p’esey awe den e colornan di nos bandera nos ta bay subi caminda cu e seis grupo di carnaval pa asina nos tin un momento pa nos celebra hunto locual cu ta di nos, pa hunto nos biba nos cultura”, Minister Maduro a expresa.

Durante su discurso el a gradici tur persona cu a traha pa e parada por ta posibel, Comision di Celebracion di Dianan Nacional, e grupo- y bandanan cu a participa y tur persona cu a Sali pa celebra y disfruta di e parada. “Danki pa boso presencia y nos ta cende e mecha oficial pasobra e parada aki ta pa cende e mecha pa carnaval 2023. Ban disfruta di locual cu ta di nos”, el a bisa.

Minister Oduber, durante su discurso, a expresa cu e ta sumamente contento cu nan por brinda Aruba un bunita celebracion di cultura. El a recorda cu e parada aki a wordo organisa pa celebra cultura, pa e musiconan, pa e entertainernan cu pa dos aña largo tabata tinele hopi dificil. “Esaki ta parti di nos exit strategy pa asina nos por brinda Aruba un bunita parada di nos celebracion cultural”, el a agrega.

El a gradici tambe tur grupo y banda musical cu a participa den e parada y a gradici Cuerpo Policial, Cuerpo di Ambulance, Rode Kruis tur e boluntarionan cu a yuda organisa e parada. “E expectativanan ta grandi, bo ta sinti e vibracion di positivismo, bo ta sinti e energia cu Aruba kier celebra un carnaval aña 2022 y awe nochi nos ta brinda Aruba e oportunidad aki. Un biaha mas masha danki na tur esunnan cu a haci esaki un posibilidad y gosa na un manera sano awe nochi y ban celebra manera semper Aruba a sa di celebra carnaval”, el a remarca.

Durante e parada Bon Dia Aruba a entrevista algun participante di e parada y a puntra nan opinion ariba e decision di Gobierno pa organisa un parada di carnaval den momentonan un poco sensibel y si tin preocupacion cu lo por tin un posibel brote di covid dentro di un of dos siman.

Sra. Esther, un carnavalista di curason pa hopi aña a bisa: “E ta sinti hopi dushi, bo no ta sinti manera e añanan a pasa, bo ta disfruta e momento y e momento ta grandi, e ta hopi dushi. Berdad hopi hende tin miedo, pero ami ta bisa bo miedo ta trece cosnan pa bo. Sea positivo y semper carga bo fe pa dilanti y bo ta sigui bay. Nan a tuma un decision, y di berdad e tabata temeroso, pero e ta bayendo bon. Mi ta spera cu tur hende rond disfruta, unda cu bo por ta semper ta safe pa bo mes y pa nos tur. Disfruta e momento pasobra awe nos t’ey y nos no sa mañan”.

Otro participante, Sr. Giel, un comerciante chikito, a bisa cu e ta haya cu e decision di Gobierno di organisa e parada nacional di luz tabata hopi bon. “Nos ta laga henter mundo sa cu nos ta habri pa turismo y ora cu e turista bin entrada ta drenta y ta bay den tur hende su saco. Mi tambe ta un comerciante chikito cu ta traha den turismo y nos a haya sla duro. P’esey mi a cuida hopi, mi no a haya covid, pero awe nos tin cu celebra y laga mundo sa cu nos ta habri pa business”, el a bisa.

Ariba e pregunta si tin preocupacion cu lo por tin un brote di covid aki un for dos siman pa motibo di e parada, Sr. Giel a contesta: “Mi ta kere cu e no ta bay pasa, ban spera cu no y manera mi a bisa mi ta traha den turismo y e turistanan cu ta drenta mi ta papia cu nan tur dia y nos a haya informacion cu nan ta echt cuida y e hendenan cu ta bin Aruba ta e hendenan cu tin manera, e Americanonan cu tin e manera y ta paga pa haci nan testnan y nan ta bin”.

Sra. Tromp, otro participante y un carnavalista di hopi aña a splica cu den un principio e no tabata di participa, pero despues a cambia di opinion. “Door cu nos ta pasando den tanto cos y en realidad mi no tabata di bin, pero ora bo tende e musica di carnaval so y bo ta cuminsa baila y bo kier enjoy, bo ta corda e pasado y mi no por a keda afo”, el a bisa.

“Mi ta bin cu miedo, pero manera mi ta bisa bida tin cu sigui y mi ta bin den nomber di Dios cu tur cos ta bay bon y mi ta spera cu na Aruba nada erg lo bay pasa cu nos por sigui gosa”, el a agrega.