Contrario na Aruba y St. Maarten, ainda Corsou no ta contribui na presupuesto di Kustwacht

Fraccionnan cu pregunta entre otro riba cumplimento cu derechonan humano den maneho di Kustwacht

E comision fiho pa Defensa di Tweede Kamer a lansa preguntanan y haci comentario na e Minister di Defensa pa e plan anual 2022 di Kustwacht pa Reino Hulandes den Caribe.

E preguntanan tabata manda pa medio di e presidente di e comision de Roon.

E miembronan di fraccion di VVD a bisa di a tuma conocemento di e maneho di personal, cu ta inclui reduccion den cierto departamento di Kustwacht y ampliacion di otro. Nan kier pa e Minister splica mas amplio con ta ekipa Kustwacht, como tambe e tumamento di personal den e paisnan Corsou, St. Maarten, Islanan BES y Aruba, como tambe na Hulanda.

Miembronan di VVD a tuma nota cu na 2021 a traha cu dronenan chikito pa ehecuta patruyanan tanto riba tera como riba lama, y ta puntra e Minister pa mira cu si den futuro tin tareanan pa e Reaper UAV’s (drone grandi) pa sostene e trabao di Kustwacht pa brinda traficacion di droga.

Tambe e fraccion kier pa e Minister enfoca riba e fayonan di e Metal Shark y ta puntra si esakinan ta resultado di un determinacion di necesidad robes of pasobra e fabricante a haci fout den e manufacturacion.

Nan ta constata tambe cu Corsou ta bay cuminza contribui entrante 2023 na e presupuesto di Kustwacht y ta puntra e Minister pa splica riba e discrepancia cu tin pa cu St. Maarten y Aruba cu si ta contribui na e presupuesto (red. Aruba ta contribui na presupuesto di Kustwacht desde su principio. Tabatin incidente unda Aruba a keda atras cu su contribucion cu a conduci na discusionnan fuerte entre Hulanda y Aruba. Entre otro, Hulanda a tuma posesion di e fondonan ora cu a bende e edificio di Plant NV, cu ta Marriott, y unicamente a debolbe Aruba parti di e placa ora cu a kita e gasto cu Aruba tabata debe pa presupuesto di Kustwacht).

Ademas, e miembronan di e fraccion di VVP a bisa cu nan a ripara cu segun e plan anual, dos di e total di 8 sistema di walradar lo keda reemplaza na 2022 y cu ta conclui e proceso aki. Pero nan ta lesa cu den e calculacion di inversion ainda ta tene cuenta cu un inversion te cu 2027 di 210 mil euro, mientras cu e sistema di radar pa e islanan St. Maarten, St. Eustatius y Saba ta specifica apart. Nan kier pa e Minister duna mas splicacion.

Miembronan di e fraccion di Volt di nan parti tin pregunta riba e papel di Hulanda den actividadnan di Kustwacht cu tin di haber cu intervencionnan haci na Corsou y e supuesto violacion di derechonan humano cu ta tuma luga na e pais. E gabinete Hulandes anterior, den un reaccion por escrito di parti di miembro Koekkoek di 14 di October 2021, a bisa cu na tur momento derechonan humano ta e fundamento di e trabaonan y cu nan mester keda respeta y proteha denter di Reino. E miembronan di e fraccion awor ta puntra e Gabinete Hulandes actual con ta para cu e combersacionnan entre Hulanda y Corsou, riba e forma con sosten di Hulanda pa migracion di Venezuela pa Corsou por continua y cua ta e resultado y mehoracionnan concreto. Tambe nan lo kier sa mas di e monitoreo y evaluacion di e eficacia y eficiencia di e sosten Hulandes y pa percura cu e tema di derecho humano ta bira parti di e agenda di e grupo di trabao encarga cu e combersacionnan aki. Segun e miembronan di fraccion di Volt, a tuma un pasahe comparativo riba proteccion di derechonan humano den e plan anual y cu e Minister ta indica cu Kustwacht na momento di ehecuta su trabaonan ta respeta e derechonan fundamental di hende. Sinembargo, pa Volt e ta keda poco claro con e proposicion di Kustwacht ta pa cumpli cu esaki. Pa tal motibo nan kier sa di ki forma a papia di derechonan humano y con ta inclui nan den e colaboracion di Kustwacht cu su partnernan.

E miembronan di fraccion ta puntra di con Gobierno Hulandes lo percura cu ta proteha e derechonan humano den e contribucion di Kustwacht y por ehempel, cua ta e medionan legal y proceduranan cu ta disponible pa personanan cu ta keda intercepta pa autoridadnan competente, por ehempel Kustwacht. Kier sa si ta informa e personanan intercepta di nan derechonan y cua ta e procedura y medionan cu nan por apela na dje.

Tambe Volt kier sa si Minister ta dispuesto pa laga haci un investigacion independiente riba e obligacionnan pa cumplimento cu derechonan humano den e organisacion di Kustwacht. Den caso cu esaki no ta bay sosode, nan lo kier sa di con. Mas ainda, e miembronan di fraccion kier pa e Minister indica cua ta e cuadro di derechonan humano cu segun e ta conta y con leu e proceduranan y forma di traha di Kustwacht ta cumpli cu esakinan. Particularmente nan kier sa esaki relaciona cu e posibilidad cu hendenan cu ta busca proteccion pa por eherce nan derechonan. E fraccion ta bisa cu a lesa cu e plan anual di Kustwacht ta describi Venezolanonan iregular como ilegal, un termino cu segun e Oficina di e Comisario Halto pa Derechonan Humano OHCHR encabeza pa ex Presidente Chileno Michelle Bachelet, mester keda evita. No por usa palabra ‘ilegal’ ora ta trata di hende, ni den ley, maneho y practica segun OHCHR. Como tal, miembronan di Volt ta puntra e Minister di e ta di opinion cu mester evita di usa e termino ‘ilegal’ pa describi migrantenan di Venezuela den e region di Caribe y si ta bay cambia esaki den e maneho y practica di Kustwacht.