Raad van Advies ta bisa cu Gobierno un biaha mas no a sigui e procesonan adecuado pa brinda e oportunidad pa haci control debido di Presupuesto 2022. Esaki a sali afo den e prome parti di e reaccion riba Presupuesto 2022 cu Diamars a keda presenta na Parlamento. Manera ta conoci, e proposicion di ley di Presupuesto ta formalmente seis luna laat.

Raad van Advies a bisa di ta pone e presupuesto 2022 na prueba entre otro segun e ley mas halto di Aruba cu ta Constitucion, pero tambe a base di e Ley di Comptabilidad y e LAft, cu tur su protocolnan y palabracionnan haci cu Hulanda, entre otro riba e norma di gasto di personal di 2020 cu mester ta na 476 miyon, cu ta inclui e Fondo Sociaal Crisis Plan.

Raad van Advies a ilustra cu Constitucionalmente, Gobierno ta obliga pa entrega presupuesto di e siguiente aña prome cu September. E hecho cu Gabinete Wever Croes tabata demisionario desde Maart 30 2021 te cu September 20 2021, no ta kita afo cu no a cumpli cu e exigencia constitucional aki.

LIM

Consecuentemente e hecho cu no a entrega e proposicion di ley na ora ta conduci na fayonan formal. E presupuesto ta traha basa riba un reparticion di Minister cu ainda no ta legal. Es mas, e LIM nobo no ta drenta na vigor te na Maart.

Esaki ta lanta e pregunta cuanto balor ta pone na tratamento di LIM 2022 den Parlamento ya cu e ta parce di ta un hecho. E institucion proponi di Ministerionan no ta aplica unicamente den practica, pero tambe den e Presupuesto. E tratamento di LIM den Parlamento, pero tambe conseho di Raad van Advies riba e ley aki pa eventual cambio lo nifica cambio den e proposicion di e ley Presupuesto 2022. Tur esaki lo por keda evita si a cana e caminda procedural corecto.

Di su banda, Minister di Husticia Sr. Rocco Tjon, den reaccion riba e conseho di Raad van Advies, den su calidad ainda di Minister di Husticia, Siguridad y Integridad a bisa cu a scoge e ruta pa presenta e LIM na Parlamento netamente pa evita retraso. Den e proposicion di Presupuesto ta referi na e LIM nobo. Pero a bin retraso den e proceso legislativo pa e LIM nobo Lo mester a trat’e originalmente na fin di 2021 y finalmente el a sosode riba Februari 3, 2022. “Mi no ta comparti e opinion di Raad van Advies cu ta sali di e punto di bista cu Parlamento ta para dilanti un hecho. Pasobra si durante e tratamento di e LIM lo a bin cambio, lo a adapta esakinan den e proposicion di e Ley di Presupuesto 2022 tambe. Pero Parlamento a acepta e LIM sin ningun cambio,” ta locual e Minister di Husticia a bisa den e nader rapport, esta e reaccion riba consehonan di Raad van Advies.

E organo consultativo a repasa e Protocol 2018-2021 riba normanan presupuestario y e hecho cu te ainda no a yega na un resolucion cu Hulanda riba otro protocol, aunke cu Gobierno di Reino a bay de acuerdo pa Aruba desvia di e normanan manera ta poni den e LAft pa motibo di circunstancianan cu a bin a base di COVID-19, teniendo na cuenta cu e ponencianan den e rijkswet Aruba financieel toezicht, Raft.

Reduccion gasto di personal publico

Locual pa Raad van Advies no ta cla ta e status di e BVP, cu ta e Beleidsplan Verlaging Personeelskosten, esta e Plan di Maneho Reduccion Gasto di Personal. CAft a papia di e BVP como un plan actual na 2021, pero Gobierno awor ta papia di e norma di 10 porciento di Producto Interno Bruto, esta GDP. Den e Raft lo determina esaki.

Riba e punto aki, Minister Tjon a comenta den e Nader Rapport cu Aruba ta trahando cu e asina yama Tijdelijke Werkorganisatie (TWO) cu ta adelanta e COHO, pa cuminza cu ehecucion di e landspakket, cu tin e tema di costo y efectividad di sector publico como un di e reformanan. Gobierno a bisa na 2019 cu e BVP mester bira mas skerpi pa baha e gastonan di personal na nivelnan aceptabel. Pero prome cu esey mester determina kico ta e nivel aceptabel. Y esey ta enfoke di e investigacionnan menciona den e landspakket. E BVP, segun Minister Tjon, den practica actual no ta suficiente pa baha e gastonan di personal. “Ta pa e motibo aki cu Hulanda y Aruba a haci un palabracion na nivel bilateral pa duna specialistanan e tempo pa berdad por baha e gastonan di personal na un nivel aceptabel di 10 porciento di GDP na 2027.”

E hecho cu tin diferente proceso cu tin hopi di haber cu otro, ta cana hunto y cu por tin influencia pa e Presupuesto 2022 ta haci e analisis formal dificil. E situacion aki ta enfatisa con importante e ta pa sigui conseho di Raad van Advies pa mehora procesonan di tal forma cu no solamente presupuesto pero tambe eventual cambionan por tuma luga na tempo. Di e forma aki tur cu tin un papel pa cumpli den e control (checks and balances) por haya e tempo y espacio necesario pa contribui na un producto di calidad. Gobierno no ta di opinion cu analisis formal di e Presupuesto 2022 ta imposibel pa Raad van Advies, y ta splica un biaha mas cu ta pa e motibo ey mes a dicidi pa trata e LIM nobo prome cu Presupuesto.

Mester bisa cu a pesar cu Parlamento a aproba e LIM sin ningun cambio, ainda e ley no ta den ehecucion. E ley lo keda formalisa na Maart.

Bon Dia Aruba lo amplia riba e analisis di Raad van Advies den siguiente edicionnan.