Hopi discusion tin y lo bay tin pa loke ta subidanan di prijs den e temponan venidero riba nos isla. Comunidad ta constata cu prijsnan di producto y servicio lo subi y lo sigui subi den e temponan venidero.
Ta bon pa nos compronde kico ta causa cu prijsnan ta subi y lo sigui subi
• Prijsnan di e productonan basico y prijsnan di e materia prima pa traha producto ta subi mundialmente.
• Materialnan di empake, manera plastic, carton y palo ta subi.
• Gastonan di transporte ta subi pa motibo cu combustibel su prijsnan ta subi.
• Prijsnan di energia, esta awa y coriente ta subi
• Inflacion ta aumenta.
• Boneiro ta depende di importacion
Pa e motibonan aki, hopi comerciante lo tin cu subi nan prijsnan si nan kier sobrevivi. Awor nan por haci esaki na dos manera, esta
1. Subi e prijsnan di golpi of ,2. Subi e prijsnan den fase.
Cualkier di e dos opcionnan cu nan scoge lo ta recomendabel pa nan comunica na tempo cu nan cliente. Nan no mester di conta tur nan stelashi di negoshi, pero si ta bon pa nan comunica y asina e cliente tin miho comprension pakico ta inevitabel cu e prijsnan di producto y servicio lo subi.
Kico comerciantenan por haci ?
Nos comerciantenan cu ta haci negoshi por cera cabes y lanta un organisacion conhuntamente cu ta importa e productonan basico na bulk. Esey lo influencia e prijsnan faborablemente.
Comerciantenan por pone presion pa realisa un haf di container aki na Boneiro pa asina baha e prijs di transporte ya cu por importa direct of no via via cu ta causa mas gasto adicional.
Comerciantenan por busca mercadonan den region cu ta bende e productonan mas barata.
Kico nos mes por haci ?
Na prome luga maneho di prijs ta un responsabilidad di gobierno di Boneiro. Pa e macutu di productonan basico, gobierno mester publica e prijsnan cu a keda stipula pa gobierno y tene un control estricto riba esaki. No por permiti subi ningun prijs di e productonan den e macutu sin cu gobierno traha un decreto riba esaki.
Pues gobierno den e asunto di subimento di prijs di pan si e ta forma parti di e p productonan den e macutu mester actua.. punto.
Nos mes como comunidad por yuda nos mes dor di haci gastonan mas consciente. Nos por spaar cen dor di entre otro haci uzo di awa y coriente mas consciente. No laga awa core pa loco, uza coriente estrictamente necesario, core auto mas consciente y spaar riba gasto di gasolin y of diesel.
Haci compra mas consciente dor di compara prijsnan di producto. No ta necesario cumpra pa marca si e producto mas barata ta mes bon.
Kico sindicatonan por haci ?
Sindicatonan por cera acuerdo cu comerciantenan cu ta brinda nan miembronan descuentonan faborabel. Den esaki e sindicato AFBW a bay dilanti. Otro sindicatonan y hasta USIBO por sigui e ehempel aki.
Sindicatonan por stimula nan miembresia y yuda nan lanta cooperativanan di haci compra hunto. Cumpra hunto ta bira interesante pa e comerciante duna rebaho pasobra e ta garantisa cu bende na un volumen mas grandi por haci su margen di ganashi tambe mas modera.
Kico gobierno di Hulanda por haci ?
Aumento di prijs ta causa perdida di forsa di compra. Esey ke men cu bo por cumpra menos producto y of servicio pa e mesun cen. E situacion aki ta afektá tur hende pero mas pisá e grupo den nos komunidat ku ta gana sueldo mínimo of net un tiki mas halto cu sueldo minimo. Tambe e ta afecta e grupo cobrado di onderstand y e grupo cu ta depende solamente riba pensioen di behes como nan unico entrada. Esaki ta pa motibo cu te ainda despues di 11 aña no a stipula un existencia minimo.
Gobierno di Hulanda den esaki por decreta un coreccion di e inflacion, Na Hulandes indexering y ta aplica esaki riba e existencia minimo y e sueldo minimo. Cu esey e gruponan mas vulnerabel den nos comunidad ta haya un compensacion pa asina por mantene nan forsa di compra.
Gobierno di Hulanda por aumenta tambe e asina yama “belastingvrije voet”. Esaki ta e montante di entrada cu un hende tin cu paga belasting riba dje. Na mi opinion e perdida cu gobierno su caha ta sufri cu e aumento aki e ta hañé compensa den e ABB cu nos tur ta paga riba compra di producto y servicio.
Gobierno di Hulanda por subsidia tambe e prijsnan di energia, esta di awa y coriente manera e la haci den e temporada cu nos a keda afecta pa Covid-19. Riba plano structural aproba e peticion di inversion di WEB pa energia alternativa cu lo rebaho costo di energia substancialmente.
Probablemente tin otro medidanan cu expertonan riba tereno di economia y belasting por propone pa compensa e aumento di costo di bida y costo di haci negoshi.
