Segun UNESCO: Sistema di scol multilingual basa riba idioma materno ta e yabi pa un enseñansa inclusivo

Den cuadro di Dia di Idioma Materno 2022, Universidad di Aruba hunto cu Fundacion Lanta Papiamento y mas instancia a organisa Dictado Nacional 2022.

Na e ocasion aki rector di Universidad di Aruba, Dr. Viola Heutger a tene e siguiente charla:

Tur aña dia 21 di februari UNESCO ta celebra “Dia Internacional di Idioma Materno”. Riba e dia aki diversidad linguistico y cultural y tambe multilingualismo ta para central.

Organisacionnan internacional ta balora fuertemente e importancia di diversidad di idioma y di proteccion di idioma di pueblo of pais chikito, no solamente for di punto di bista di “derecho”, sino tambe pa garantisa diversidad cultural.

Idioma ta hunga un papel importante como cargado di “Herencia oral y intangibel di humanidad”. Perdida di idioma ta perdida di conocemento cultural, historico y ecologico. Kiermen cu e meta ta pa garantisa vitalidad di idioma.

Pa sobrevivencia di idioma chikito tin diferente factor cu ta importante: uno, transmision di e idioma entre e generacionnan, y di dos, e cantidad di papiado y e areanan social den cua ta uza e idioma. A base di e factornan aki por haya sa si existencia di e idioma ta core peliger.

Banda di esey e posicion di gobierno relaciona cu e idioma y e actitud di e papiadonan mes tambe encuanto nan idioma ta di sumo importancia. Un gobierno cu ta garantisa un miho proteccion di diversidad di idioma, ta esun cu ta respeta tur idioma den e pais como parti di e diversidad cultural, y cu ta proteha tur e idiomanan aki pa ley y cu tambe ta stimula nan sobrevivencia.

Pa UNESCO un sistema di scol multilingual basa riba idioma materno ta e yabi pa un enseñansa inclusivo.

E tema di dia internacional di idioma materno 2022 ta pa logra un desaroyo husto di enseñansa multilingual y un desaroyo di bon enseñansa di calidad pa un y tur. Laga nos pone nos mente, curason y mannan hunto pa logra enseñansa den idioma materno pa tur mucha na Aruba. Ban evita cu aki binticinco aña mester traduci e texto di nos himno nacional pa nos mes por compronde.