Parada Nacional di Luz ta bay door

Ayera tardi durante un conferencia di prensa a tuma luga trekmento di lot pa secuencia di e gruponan di carnaval cu lo ta participando den e “Parada Nacional di Luz 2022” diasabra 26 di februari. Durante e conferencia Minister di Cultura y Finanzas, Sra. Xiomara Maduro, hunto cu Minister di Turismo y Salud Publico, Sr. Dangui Oduber, a elabora ariba informacion pa locual ta trata e parada y a reacciona tambe ariba e accionnan cu a tuma luga di parti di algun sindicato cu a tuma luga diabierna tambe.

Minister Maduro a confirma, mirando especualcionnan cu tabatin pa locual ta trata e parada, si esaki ta bay door of no, cu dia 26 di februari e parada nacional di luz, cu ta wordo organisa den antesala di e celebracion di e dia nacional otro luna, ta bay door.

“E ta un momento cu nos tur ta bin hunto, parti di e exit strategy, pa asina recorda cu nos a pasa un momento hopi fastioso tras di lomba. Ainda tin hopi reto nos dilanti, pero na e momentonan aki nos ta bay para keto un rato como pais, nos ta bin hunto laga tur cos atras cu por dividi nos, nos ta bin hunto pa den e union ey celebra un momento, e hecho cu Aruba tambe ta scoge pa bay dilanti”, el a indica.

Minister Oduber a splica cu conforme e exit strategy cu Gobierno ta ehecutando pa bolbe back na normalidad, Gobierno a anuncia e siman aki cu ta elimina tur medida di COVID-19 y como parti di bolbe back na normalidad, Minister a indica, tur actividad cu tabata existi y por a wordo organisa prome cu COVID-19 a bin, lo por mira continuacion.

“Den esaki bo ta mira Aruba tambe proactivamente como trendsetter a tuma e curashi y tabatin e determinacion pa anuncia e fiesta cultural di mas grandi cu Aruba conoce pa organisa un parada di carnaval. Nos ta mira mundialmente tur pais na mundo a flexibilisa. Na Hulanda mes tambe nan a anuncia cu nan carnaval tambe ta bay door, kiermen no ta nada inusual cu nos ta haciendo na Aruba”, Minister Oduber a remarca.

El a señala cu den cuadro cu esaki nan a haci un apelacion na tur e companianan estatal pa contribui manera semper nan tabata haci pa e ultimo decadanan aki cu carnaval. Minister a menciona cu ya caba diferente compania estatal a duna indicacion cu nan lo ta participando y nan lo ta dunando nan contribucion.

“Nos kier a gradici nan pa nan contribucion pa asina nos por organisa e parada, e fiesta aki pa comunidad na un manera responsable pasobra manera nos a bisa ora nos a anuncia e parada nacional di luz, e situacion na e momentonan aki ta permiti pa nos organisa un parada pasobra simplemente e ta parti di nos exit strategy manera nos a bin ta ehecutando”, el a agrega.

Pa loke ta trata e accionnan cu a tuma luga diabierna di parti di sindicatonan SADA y SPA cu a vocifera nan malcontento pa loke ta trata e parada nacional di luz mientras cu ainda nan ta bringando pa elimina e recorte salarial di 12.6% y haya nan placa back, Minister Maduro a indica cu nan a tuma nota di e accionnan aki.

“Nos tur sa niun hende ta riba ley, nos tin leynan na Aruba, nos tin reglanan na Aruba, nos tin casonan den corte cu otro sindicatonan caminda hues caba a duna un bista di kico por spera. Tur hende sa kico ta usual y kico no ta usual ora cu ta pone trabou abao, tin e reglanan cu ta stipula y esakinan tambe ta e reglanan cu lo wordo aplica y cu ta wordo aplica”, el a enfatisa.

El a continua indicando sindicatonan sa hopi bon (“drommels goed”) kico ta pasando aworaki y esun cu actua contra e ley- y reglanan sa tambe cu tin consecuencia na e actuacion. “Niun acto no ta bay sin su consecuencia”, Minister a bisa.

Minister Oduber tambe a comenta riba e posibel accion di polisnan y a señala cu nan como Gobierno tin comprension pa nan y cu nan tambe ta buscando tur manera con e trahadonan por haya e 12.6% back. Pero el a subraya cu e sindicatonan tambe mester tin comprension cu e musiconan, e entertainernan cu pa casi dos aña tabata biba riba 0% salario.

“Nan no tabatin un entrada pa dos aña y di e forma aki nos a busca un manera con pa nan tambe por haya un break despues di dos aña di tabata biba riba 0%”, Minister Oduber a expresa

Mirando e confusion cu tin ainda pa loke ta trata si dialuna 28 di februari ta un dia liber oficialmente si of no, Bon Dia Aruba a puntra Minister Maduro tocante e dia aki y Minister a contesta cu segun el a compronde desde siman pasa caba Departamento di Labor a saca e informacion cu conforme ley dialuna 28 di februari ta un dia liber. “Aña pasa tabatin hopi discusion ariba esaki y el a keda un dia liber y e aña aki Departamento di Labor a sali indica dialuna ta un dia liber”, el a finalisa.

Pa loke ta trata trekmento di lot di e gruponan di carnaval, e secuencia ta como lo siguiente:

Grupo 1: Pink 4 Life Carnival Group compaña pa Le Groove.

Grupo 2: Dushi Carnival Group compaña pa Upgrade Music y Jeon.

Grupo 3: Infinity Carnival Group compaña pa D’-Licious.

Grupo 4: Royal Carnival Group compaña pa NBO.

Grupo 5: Majestic Carnival Group compaña pa Youth Xtreme.

Grupo 6: Empire Carnival Group compaña pa Buleria.