San Nicolas Business Association kier pa Gobierno y habitantenan cu a lanta caso contra e proyecto Secrets yega na un resolucion pa sigura cu e proyecto por sigui na interes di tur. E por ta un sacrificio, pero uno necesario pa bienestar di desaroyo di San Nicolas y di P’arib’i Brug, ta opinion di e organisacion.

SNBA cu e Aliansa di P’Ariba di Brug a tene un conferencia di prensa na Jads, den edificio di Nanki Club pa expresa nan preocupacion cu e proyecto di Secrets ta para. E paro tabata riba instruccion di Huez di LAR cu a instrui Gobierno pa revisa e proceso di dunamento di erfpacht y bouwvergunning, den luz cu entre otro e proyecto no ta cuadra cu e rekisitonan di e ROPV, esta e Plan di Ordenanza Teritorial cu Regulacion.

Den e ROP, a asigna e tereno pa destinacion turistico, pero cu un maximo di 600 camber. Secrets a haya bouwvergunning pa den dos fase yega te na 900 camber, algo cu e habitantenan mustra den nan argumento na LAR. Ademas, nan a argumenta tambe cu e nivel di e hotel ta nifica cu nan lo perde nan privacidad ya cu e cambernan lo tin bista den cura di nan cas. Mientrastanto, DOW a apela e decision di Huez de Haseth.

Pero pa SNBA, tur esaki ta tardanza cu por trece e proyecto y tur otro desaroyo na San Nicolas den peliger. Pio, e orden di huez a nifica cu mester a manda un cantidad di trahado di construccion cas y awor ta hendenan cu no tin entrada.

Despues di hopi aña cu problemanan socio-economico, por fin a haya un inversionista dispuesto pa traha un proyecto – a pesar di e bista di refineria, a pesar di e posibilidad cu refineria por bolbe habri, a pesar di un caminda largo pa yega na Colony – unda por crea empleo pa 300 hende. “Nos ta considera esaki [red. e paro temporal di construccion] un atentado contra P’ariba di Brug,” Presidente di SNBA, Andres Hernandez a a bisa.

Aliento positivo

Di su banda, secretario di SNBA Errol de Freitas, e organisacion, banda di e papel di sostene comercio na San Nicolas a asumi un rol social tambe. Y como tal, a mira cu hopi dolor, con poco poco, hendenan di San Nicolas ta muda bay biba na otro region riba e isla pa motibo di falta di perspectiva. Ademas, mayoria ta traha den e parti West di Aruba cu ta trece su costo di transportacion. “Pero e area aki tabata destina y a cuminza traha riba desaroyo di un hotel caba. Den caso di Secrets, nos a haya un grupo serio cu no obstante e refineria a bin aki.”

Segun De Freitas, aunke ta trata di un proyecto di All Inclusive, e desaroyadornan a sigura cu nan tambe kier pa nan clientenan explora e area y conoce mas di San Nicolas. “Es mas, nan a duna nos dos aña pa prepara pa ora cu nan clientenan yega.”

Consecuentemente esey a trece un aliento positivo y cu esey a bin mas energia pa inverti den facilidadnan cu ta bira posibel danki na e proyecto di Secrets. “Dicon diripiente ta bisa cu e proyecto no ta bon y ta bay Huez? Mester djis mira rond y mira e desbalance.”

De Freitas ta referi na e desaroyo pisa na Noord. Y San Nicolas no kier un desaroyo similar. “Si tabata nos escogencia, nos lo no tabata kier uno asina grandi (Secrets), pero lo mira si cu e ta bay ta un catalisador.” Un catalisador pa inversionnan mas chikito cu ta cuadra cu locual kier pa San Nicolas, segun e secretario di SNBA. “Di nos parti, nos ta pidi pueblo di San Nicolas y Pariba di Brug en particular pa sosten, pasobra e ‘spin off’ ta positivo. Y pa logra esaki nos mester sacrifica algo.”

Y De Freitas ta enfatisa cu SNBA a para duro cu e desaroyadornan pa no tuma e beach pa nan, ni tampoco kier actividad acuatico motorisa. Pa esaki tin e beach na Cura Cabay. “Hende di San Nicolas ta critico riba nan mes, corda riba otro.”

SNBA lo ta contento si refineria por bolbe habri, pero mientrastanto ta trahando pa trece bida back den cayanan di San Nicolas. “Contra biento y mareo nos mester desaroyo na San Nicolas y e ta rekeri un sacrificio. Pero despues lo mira e frutanan,” De Freitas a bisa, urgiendo comerciantenan local pa kere den e area y cuminza inverti y sigui ehempel di Secrets.

Oportunidad pa desaroyo structura.

Aunke cu SNBA kier un desaroyo structura, ta sinti si cu netamente awor un grupo ta haci uso di un ROPv pa stroba un desaroyo necesario. Algo cu no a sucede ora cu tabata traha tur e hotelnan na Noord. Awor San Nicolas ta haya oportunidad cu Secrets y tambe un boutique hotel di 40 camber pega na Jads y Serena Residences cu tin doño nobo, cla pa cuminza reconstruccion. “E mester ta un movemento pa trece cambio. E no ta cu nos kier pa Gobierno haci excepcion di e ley. Locual mi sa cu prome cu e prome bloki a bay riba e tereno, tabatin palabracion di e cantidad di camber.” De Freitas ta pidi pa laga e baby cuminza cana, pasobra ta parce cu semper San Nicolas mester keda atras. “No pone un paro na desaroyo pa 42 porciento di e populacion di Aruba.”

Pakico stroba construccion di 600 camber

Andres Hernandez ta puntra cu si e problema ta 900 camber, “pakico para e construccion di 600 camber. Mi no a wak e problemanan aki nunca P’abao di Brug. Si e hendenan no a cuminza hinca miyones den nan proyecto, ta kere cu un Jads lo a bay busca financiamento pa su boutique hotel? No. Sin e inversion di Secrets, lo a haya un cumprado pa Serena Residents? No. Nos tin un catalisador. Nos no kier pa e bay contra ley, pero nos mester di dje, pasobra San Nicolas mester di dje.”

Hernandez a mustra cu ta un grupo chikito cu ta actuando contra interes di casi mita di e poblacion di Aruba. “Si ami tabatin mi cas banda di nan, kizas mi tambe lo ta hunto cu nan. Pero kico ta mas grandi. Laga nos ta claro, nada ta bin sin sacrificio.”

Huez

Errol de Freitas a bisa cu SNBA mes no tin ningun papel legal pa hunga den e impasse cu a lanta cu Secrets. “Nos no tin un rol legal, pero nos ta mira pueblo. Un hende por ta un Huez di Aruba, bo por ta imparcial, pero mester wak rond. Hopi biaha ta tuma decision cu no ta logico.” Di su banda Hernandez, kende a bolbe bisa cu e caso den Corte ta un atentado contra San Nicolas, ta bisa cu comunidad no mester mira Secrets riba su so. “SNBA ta mira kico tur locual Secrets lo por stimula na inversion. Mas ainda, hasta huespednan di all inclusive ta busca experiencia pafo di e hotel.”

Ta spera cu Gobierno y Secrets por bini hunto pa den luz di e sentencia, yega na un resolucion mas pronto posibel na interes di comunidad di San Nicolas. “Nos tin cu yega na e punto pa nan yega na e acuerdo. Un Huez ta un ser humano, tin ley, pero mester mira con leynan ta mescla. Nos tin e conviccion cu e proyecto ta sigui. Henter e discusion ta di 600 of 900 camber.”

Riba potret: Miembronan di SNBA hunto cu e Aliansa Pariba di Brug tabata acompaña pa Parlamentario di MEP, sr Alvin Molina.