Violencia y bullying ta bin tumando luga for di basta tempo na scolnan, unda dia pa dia comunidad ta mira riba rednan social casonan lamentabel. Ttin biaha cu esaki tambe ta caba na momento cu e victima ta dicidi di kita su mesun bida pa motibo di agresion y violencia cu e ta sufri na scol.
Un caso cu a keda conoci na nivel mundial a tuma luga na Merca dianan pasa, na momento cu un mucha homber di 12 aña di nomber Drayke Hardman a comete suicidio door cu e tabata sufri di bBullying na su scol. Su mayornan a publica su potretnan riba rednan social tempo cu e tabata den hospital, pa asina conscientisa hende y mayornan pa ta mas alerta cu nan yiunan.
Ayera tardi na Aruba, un mama cu tin su yiu di 14 aña interna den hospital pa via di bullying cu a bin sufriendo na scol a duna un conferencia di prensa, pa asina ey informa comunidad tocante e caso di su yiu, kende a ser agredi pa otro dos compañero di scol.
Zully Bedoya – kende a duna su declaracionnan para den parkinglot di Hospital Dr. Horacio Oduber – a splica cu su yiu tin varios dia interna na hospital pa via cu el a ser agredi verbal y fisicamente na scol unda su yiu ta studia, esta Maria College.
Bedoya a informa cu diamars ultimo den oranan di atardi, dos compañero di scol, dos ruman mucha muhe, a golpia su yiu varios biaha na su cabes paden di scol Maria College MAVO. Riba un video publica riba rednan social por a mira cu despues di e agresion, e victima a cay flauw riba vloer. Ademas e mama a bisa cu e situacion aki tin algun luna tumando luga, unda e dos mucha ta bully su yiu.
Bedoya a conta cu el a bay scol 4 biaha pa papia cu directiva tocante e situacion aki di su yiu, y di e mesun manera nan kier a tuma contacto cu e mayornan di e dos mucha pa por resolve e situacion; pero e no a haya ni un contesta ni un solucion.
Tambe el a conta cu e mesun dia diamars, e dos mucha muhe a menasa su yiu.
“Mi yiu a haci lo posibel varios biaha pa papia cu e docente di cuido y varios otro docente pa haya ayudo, pasobra e no tabata kier yega na e situacion di aworaki”, Bedoya a comenta.
Na e momentonan aki su yiu ta interna den hospital for dia diamars, unda segun Bedoya a informa, e ta sigui cu dolor, no por cana y su horea ta sangra. Bedoya a bisa cu pueblo di Aruba no por sigui permiti esaki na scolnan unda cu muchanan ta victima di bullying door di otro compañeronan di klas. El a pone como responsabel Maria College, minister di Husticia Rocco Tjon y minister di Enseñansa Endy Croes pa e situacion aki cu su yiu. E kier un contesta di kico lo pasa cu su yiu y ki medidanan nan lo tuma.
“Ley tin cu actua, kico ta bay haci? Mi kier contestanan di e ministernan di kico lo pasa cu e bullying? Kico nos ta bay warda?”, el a bisa.
El a duna di conoce cu ta organisando un marcha pa manifesta rechaso pa bullying na Aruba ,aunke e no a duna mas detaye di esaki pa motibo cu te ainda no tin fecha.
Bedoya a informa tambe cu el a haci e denuncia na Recherche y na SKOA. Redactor di Bon Dia Aruba a tuma contacto cu director di SKOA, Anuesca Baly pa puntra kico ta su opinion di e caso aki? Tambe a puntra si tin un investigacion tumando luga y ki decision nan lo tuma cu e dos studiante cu a agredi e yiu di Bedoya.
Riba e video riba rednan social ta mustra bon con un di nan ta golpia e mucha muhe aki den presencia di docentenan y otro studiante, cu tabata graba e momento sin cu niun di nan a actua pa detene e agresion. Tte ciere di edicion aki, nos redactor no a haya contesta di Baly.
Bedoya a aclaria tambe cu e no ta saca su yiu di e situacion unda cu tin biaha muchanan ta tira palabra pa otro, pero cu esaki no mester a yega asina leu y cu e mama di e muchanan mester a papia cu Bedoya pa resolve e situacion di e manera mas sano.
Tambe redactor di Bon Dia Aruba a puntra minister di Husticia, Rocco Tjon tocante e caso aki, pero minister Tjon tabata bezig den un reunion y no por a duna un contesta riba e caso, segun su PR a indica.
Arma di candela na scol
Otro situacion preocupante pa comunidad a tuma luga e dia di ayera, segun e medio local 24ora a reporta, cu ta e caso di un hoben studiante di SPO di Brazil cu a hiba un arma di candela na scol y ‘tabata cla pa tira den klas’.
For di oranan di mainta di ayera polisnan di recherche di San Nicolas tabata bezig na SPO debi cu nan a topa cu un arma di candela cu un mucha a hiba na scol. Segun e reportero a conta, e alumno a ‘crank arma y tabata cla pa tira otro personanan den su klas’.
Manera ta conoci, esaki no ta e prome biaha cu un incidente asina ta tuma luga na SPO, unda cu algun studiante ta bringa contra otro studiante of docentenan, loke ta un situacion di presion pa tur esun cu ta traha y ta studia na e luga aki.
E mensahe ta pa mayornan keda alerta riba pa e situacion aki no sigui tuma luga, ningun mucha mester tin miedo di bay scol, sinembargo, na hopi luga rond di mundo, scol ta un luga hopi peligroso, lastimamente violencia na scolnan for di Bullying te hasta acoso y golpinan ta frecuente cu ta parce inevitabel, pero esaki no ta asina, si ta evitabel y tur hende por actua pa evita cu e situacionnan aki lo sigui tuma luga na scolnan.
