Ayera mainta un grupo di trahado di instituto coreccional KIA a dicidi di mustra nan mal contento poniendo nan trabao plat pa un par di ora, pa exigi na minister di Husticia Rocco Tjon un contesta tocante algun punto di preocupacion cu nan tin, por ehemplo, e situacion cu e director.
Rene Bernabela di sindicato TOPA a splica cu trahadonan di KIA a tene un reunion na pia di trabao organisa door di sindicatonan, pa motibo cu for di basta dia caba, tin disgusto entre e personal di KIA.
Bernabela a informa cu nan tin 11 punto unda nan ta cuestiona e director di KIA, Gino Winklaar. Tambe nan a tende di un declaracion di parti di minister Tjon den cual el a duna di conoce cu e director di e instituto coreccional ta bao menasa di morto, y pa e motibo ey gobierno a dicidi di manda e director cas pa su mesun seguridad, segun loke Bernabela a declara.
Despues di e reunion di sindicato TOPA cu su delegadonan na oficina, Bernabela a pidi nan pa pasa na e opleiding center na Balashi, pa asina e haya sa kico ta e situacion den opleiding center. “Pa nos sorpresa ora e delegadonan a pasa na e opleiding center na Balashi, nan ta bin topa cu e director di KIA, kende ta trahando na e opleiding center na Balashi. Awor nos pregunta na minister Rocco Tjon – kico tin di berdad riba e declaracion den e caso aki? Pasobra no por ta asina cu minister Rocco Tjon ta bisa cu tin un menasa di morto pa cu e director di KIA, esaki pa su seguridad y di su famia ta na cas, y ta resulta awor cu director ta trahando suavemente na opleiding center na Balashi”, Bernabela a bisa.
Ta p’esey cu trahadonan di KIA na e momentonan aki ta disgusta y rabia. Den e caso aki nan ta puntra nan mes con por ta posibel cu ta informa di un cos asina serio di menasa di morto pa cu director di KIA y ta resulta cu e persona aki ta trahando na otro departamento di KIA? Pa e mesun motibo nan a convoca un reunion of walk out, cu manera Bernabela a sigura, ta mesun cos, y cu e punto ta keda cu tin un preocupacion y un disgusto grandi pa e maneho cu e director ta hibando na e momentonan aki.
Trahadonan a señala cu ta basta cu e maneho cu e director ta hibando y ta keda na gobierno, den caso aki minister Tjon pa e tuma e decision di kico ta bay haci.
Di su parti, minister Tjon a publica un comunicado den cual el a señala cu e informacion cu director di KIA lo ta na cas no ta cuadra cu realidad. “E organo independiente, cual ta “stelsel bewaken en beveiligen” a indica cu e director na e momentonan aki no por ta na KIA. Cada menasa ta diferente y e informacion di e menasa ta dicidi e tipo di medida cu ta wordo tuma. Pa e motibo aki e ta algo cu ta wordo observa continuamente, pues na momento cu ricibi conseho for di e organo aki, e director lo bolbe back KIA. E ultimo punto cu a wordo menciona ta cu durante nan ultimo reunion, nan a expresa nan malcontento cu e funcionamento di e director, di cual minister Tjon a indica na nan cu e lo hiba un combersacion cu e Director y traha palabracionnan y lo mantene nan al caso di esaki”, e comunicado a indica.
