Junior Rivas, un ciudadano preocupa pa situacion di turismo na Aruba, a yama un conferencia di prensa ayera mainta pa asina trece dilanti su punto di bista como trahado den sector di turismo pa loke ta trata pandemia di Covid-19, y e nivel di Aruba riba lista di CDC di Merca na e momentonan aki, cu te ainda ta den codigo cora.
Pa Rivas, e situacion aki ta uno complica y fastioso pa motibo cu e ta perhudicando efectividad pa cu e fluho di turismo di Aruba den temporada halto y esnan cu ta traha den sector turistico pa diferente aspecto. Aunke turismo ta bin recuperando di manera satisfactorio y turistanan ta bin y ta sinti nan mes mas sigur na Aruba cu na nan mesun pais, segun loke Rivas a conta, e departamento aki ta opta pa recomenda hende pa no biaha pa Aruba.
“ Na mi opinion y mi percepcion, esaki ta un situacion caminda mi por bisa, e no ta refleha ningun transparencia pa loke ta regarda postulacion y revocacion for di e lista cu nan ta yama e red code list”, Rivas a señala.
Ademas, el a declara y mustra un documento cu tabatin fecha 21 di november di 2021, den cual e Centro pa Control y Prevencion di Malesa (CDC) di Merca a monitoria tur e casonan y nan a bin cu loke ta wordo yama Travel Health Notices, caminda cu nan a structura e cifranan di acuerdo cu e diagram. Y a base di un poblacion di 100.000 hende, den un acumulativo di 28 dia unabes cu ta surpasa 500 caso, e pais ta wordo postula riba e red code.
“Si nos haci un estadistica di e [cifranan], te cu ayera diamars 15 di februari, Aruba a minimalisa su casonan te na 62 caso activo. Aruba ta supposed di ta no solamente afo for di e red list, pero aworaki Aruba ta supposed di ta riba e yellow list, cu ta refleha entre 50 pa 90 caso”. El a comenta.
Tambe el a sigura cu nan sa cu e bienestar di salud di hende ta prioritario, pero di otro banda nan mester bisa cu CDC su recomendacionnan negativo ta refleha cu nan a perde fluho y proyeccionnan posibel, loke ta afecta e efectividad di fluho di turismo. Y segun Rivas a expresa, “CDC ta actuando di mala fe”, el a señala.
Ta p’esey cu Rivas ta pidi atencion di e gobernantenan local riba e punto aki, pa asina nan revisa e asunto aki. El a enfatisa cu esaki no ta trata di ningun complot contra gobernantenan of critica contra nan manera di maneha, pero e ta sinti curiosidad y intriga di con por ta posibel cu Aruba tin oficina di turismo na Merca y “por ta nan ta trahando tras di cortina y nan ta prefera di no trece esaki den publicidad” pero den su opinion Rivas ta bisa cu “pueblo mester haya sa e berdad, pasobra e fluho di turismo ta nos legado”.
Pa finalisa, el a informa cu dialuna 21 di februari CDC mester reevalua e posicion di Aruba den e lista aki.
