Encuentro entre activista Anouk Balentina y Secretario di Estado den luz di salud publico y un peticion pa asistencia di RIVM
“Locual lo nos desea ta pa RIVM bin haci un investigacion riba dump.” Asina activista mr. Anouk Balentina a bisa Secretario di Estado Alexandra van Huffelen durante un encuentro breve dilanti dump di Parkietenbos.
E encuentro tabata uno spontaneo, mirando cu e no tabata den e agenda di van Huffelen. Esaki a pesar di e hecho cu mr. Balentina a haci un peticion por escrito na e Secretario di Estado, cu a inclui henter su dossier cu el a acumula riba e problema di dump. Es mas, Sra. Balentina a manda un remitido pa media, unda e ta reacciona riba e hecho cu a inform’e cu na prome instante, Sra. Van Huffelen lo pasa dilanti dump, pero cu no tin e tempo pa papia cune. Den e publicacion, Anouk Balentina a gradici e Secretario di Estado pa su bishita, ya cu esey a percura pa actividad di parti di Gobierno. “Diripiente a bin yen di hende y instancia den accion pa percura cu pafo di dump di Parkietenbos ta mustra limpi diripiente. Pasobra imagen ta unico cos cu ta conta.
Diripiente a tapa buraco den caminda, y mesora tabatin ekipo pisa y santo disponible riba dump pa evita cu no tin candela spontaneo. Den su carta, mr. Balentina a bisa cu algun siman pasa, ora cu un cantidad di taira a pega na candela no tabatin ningun bulldozers ni santo disponible. “Na e banda drechi di e entrada, lo mira un cantidad di container riba otro, probablemente pa stroba pa mira den dump. Mi ta spera cu por mira tras di e fachada aki y para un rato. Puntra e chauffeur pa drenta pa mira e incinerador. Esaki sigur lo ta para keto pa no mustra cu tin molester.”
Y Alexandra van Huffelen a dicidi pa tuma tempo pa Balentina, kende apenas algun ora prome a haya e notificacion cu e lo tin un encuentro cu e Secretario di Estado. Durante un parada di como 20 minuut, Anouk Balentina, den presencia di habitante di e bario, Marjorie Vermeer y tambe experto, Ing. Leo Henriquez a haya oportunidad pa expresa su preocupacionnan riba dump cu Secretario di Estado.
Sra. Van Huffelen a puntra Balentina pa splica kico ta su preocupacionnan mas grandi y aki e aspecto di salud publico a bin dilanti. Mr. Balentina a ilustra cu e mes ta di e bario, y cu su mayornan tambe ta biba cerca di dump. Ademas cu e mes conoce e leynan medio ambiental como un persona cu a traha 18 aña na DIP, su mama tambe conoce e situacion di salud ya cu su trabao tabata na Departamento di Salud. Y durante tur e añanan cu a transcuri, e unico cos cu e bario a nota ta con dump tabata sigui crece y no tabatin un maneho coherente pa controla e candelanan ni pa sigura cu tin un solucion. Consecuentemente, no solamente e mes, pero su yiunan y hopi hende den bario tin constantemente problema cu nan salud.
Balentina a informa Sra. Van Huffelen cu tur e actividadnan riba dump, e falta di maneho y sigur falta di consideracion pa salud publico ta un acto contra derecho humano. Secretario di Estado a tuma tur tempo pa scucha kico tur Sra. Balentina kier a trece dilanti, cu tabata dirigi un biaha mas riba salud publico, e falta di maneho y e hecho cu e actividadnan ta sosode contra ley, sin cu Gobierno ta realmente preocupa.
Riba e pregunta kico e como Secretario di Estado por haci, Sra. Balentina a bisa mesora pa laga e instituto di investigacion riba medio ambiente di Reino, RIVM haci un investigacion profundo di e peliger di dump, mescos cu a sosode na St. Maarten. Tambe el a urgi Sra. Van Huffelen pa tuma nota di e rapport di PAHO y tambe e ultimo di CARMABI riba e peliger di dump pa hende y naturalesa. Secretario di Estado van Huffelen a sigura Sra. Balentina cu e lo trece e punto aki durante su discusionnan cu Gobierno di Aruba.
Sra. Marjorie Vermeer, kende pa hopi aña tabata den Stichting Parkietenbos por a confirma tur e puntonan cu Anouk Balentina a trece dilanti. Di su banda, Ing. Henriquez a informa e Secretario di Estado cu dump ta un sero di materialnan peligroso, incluso asbestos y material radioactivo cu mester di atencion mas lihe posibel.
Anouk Balentina, kende tin otro caso den corte contra Gobierno riba e mesun tema di dump, a informa e Secretario di Estado cu el a gana su caso sumario contra e uso di incinerador, y cu door di esey a bin cierto reglanan. Pero asina mes, no tur ora ta tene cuenta cu e bario cu ta pone cu e mester paga deurwaarder su mes, pa forsa Gobierno mantene su mes na e decision di huez. Balentina a urgi Secretario di Estado Alexandra van Huffelen, pa a base di e principio di concordancia di leynan den Reino, yuda e habitantenan di Parkietenbos y bisindario haya un miho condicion di bida, y alabes percura cu ta bin cu un maneho di desperdicio cu ta basa riba ley.
