Hopi di nos, ora nos ta trip riba un dia liber, o cualkier momento cu nos tin tempo pa esey, nos biahe riba e isla chikito aki ta yega na e punta extremo na banda di unda solo ta sali. Riba e halto di Sero Colorado nos tin un tremendo vista riba e parti di nos isla, cu pa un gran parti no conoce poblacion, salvo e viviendanan escazo cu a keda di e anteriormente asina prospero Lago Colony.

Pero riba e sero ey tin algo mas di mira cu solamente tera o lama. Cerca di e parking lot nos ta topa cu varios circulo traha den concret cu obviamente mester ta construi hopi aña pasa.

Nan ta loke a keda di e platformnan cu tempo di Segunda Guera Mundial tabata sirbi como base pa e cañonnan enorme cu e forzanan aliado a instala como defensa pa Aruba, y pa controla trafico marino den e lama entre Aruba y costa firme. Cierto di nos lo tin familiar di generacionnan pasa cu a sirbi den e cuerpo voluntario y e subsiguiente contingente di hende homber hoben yama pa servicio militar. Hunto cu nan a sirbi militar di varios pais, di Francia y despues di Inglatera y Escocia, pa despues keda reemplaza pa forzanan militar Mericano. Nan presencia no tabatin di haci solamente cu e hecho cu Hulanda tabata ocupa pa e Alemannan, di manera cu nan no por a goberna nan teritorionan di ultramar. Otro motibo tabata cu e refinerianan di Aruba y Curaçao den e epoca ey tabata di importancia strategico pa e forzanan alia, ya cu dado momento como 80% di e combustible pa avion tabata bin di e refinerianan aki. Y forza di operacion di aviacion a bira e pieza clave den e guera, tanto na Europa como na Asia, contra Hapon. Motibo obvio pa nan bira obheto di ataque di e forzanan Aleman.

E dia historico a bira 16 di februari 1942, na momento cu e submarino aleman identifica como U-156 a cuminza ataca e tankernan cu tabata den y na parti pafor di e waf di e refineria, cu torpedo. A logra sink Pedernales y Oranjestad y daña varios barco mas. E desastre material y mas cu tur cos humano tabata inmenso; e ataque a costa bida di 47 persona riba e barconan. Varios di nan tabata nabegante di Bonaire, mientras tabatin a bordo tambe persona di varios otro nacionalidad.

E siguiente ataque riba e refineria mes a fracasa pa motibo di averio na e cañon di e submarino, loke tabata un alivio grandi. Segun historia recogi den famia, pa varios siman tabatin hende cu tabata biba den e areanan mas cerca e refineria, cu tabata drumi na cas o den cura di otro hende den e partinan mas aleha, pa miedo di un otro asalto di e marina Aleman. Den e siguiente añanan Alemania no a resulta capaz mas pa ripiti e hazaña; pa e temponan ey e problemanan logistico tabata considerable, y e refinerianan a mantene nan operacion intacto, loke a contribui grandemente na e avance di e forzanan aliado den e guera.

Relacion Aruba – Merca

Mescos cu nos como hende local ta biaha te unda lama ta para nos, esey ta e caso tambe di miles di bishitante di exterior, cu ta yega te Sero Colorado, y cu tin biaha ta puntra cu cierto asombro kico e circulonan grandi ey ta significa. Ora conta nan di a historia comparti di Arubiano y Mericano di 80 aña pasa, cu conhuntamente tabata defende e unico pida continente America cu a sufri un ataque di e forzanan Aleman, no ta straño di mira nan bira emocional bo dilanti. Na e momento ey, nan condicion di turista ta bira irelevante, loke ta haciendo ta recorda un pasado comparti, di lucha pa mantene libertad contra e forzanan fascista di e tempo ey.

Pakico no ta haci e recuerdo comparti mas visible?

Cu e relacion estrecho cu nos isla tin te awe cu Estadonan Uni, como nos partner economico mas importante, a traves di turismo y como abastecedor principal di nos economia den tur sentido, lo no ta logico pa conmemora e relacion cu tabata existi 80 aña pasa caba, y cu a conduci na e experiencia comparti di e tragedia mas grandi cu a sucede riba nos isla, cu segun nos opinion ta haya demasiado poco atencion. No lo requeri inversion asina grandi pa pone algun informacion di forma duradero na Sero Colorado y na Kustbatterij, asina cu cualkier bishitante, yiu di tera o bishitante stranhero, por lesa kico tabata nos historia comparti na e sitionan aki. Hopi biaha nos ta tende hende papia di nos historia, nos cultura, loke ta bon, pero ta bira tempo pa concretiza esaki cuminzando cu e hechonan di pasado cu a conmove nos comunidad intensamente tanto aña pasa, pero cu awendia no ta haya poco atencion.

Foto Cañon na Kustbatterij cortesia di: lago-colony.com

Demas imagen: Bon Dia Aruba.

Pa mas detaye di e sucesonan di februari 1942 nos ta referi na e publicacionnan di Dufi Kock y pagina special riba: historiadiaruba.aw