Gobierno mester inverti 150 mil florin pa trece cambio den e leynan anticua cu ta e base di dunamento di permiso. Asina Minister Geoffrey Wever a ilustra den presentacion di e cuater proyecto identifica pa ehecuta den cuadro di reforma economico.

Manera ta conoci, e Minister a duna Parlamento un presentacion di e proyectonan aki Dialuna ultimo, y ayera a haci un presentacion pa comunidad.

Ta cuater proyecto di 150 cu e Economisch Bureau Amsterdam a identifica cu ta necesario pa yuda Aruba reforma su economia. Aunke cu e ta zona poco, ta trata proyectonan grandi cu ta rekeri inversion y trabao legislativo enorme, como tal ta forma e base pa cualkier otro den futuro.

Proyecto grandi pa cambia ley di permiso

E prome proyecto ta e leynan riba maneho di dunamento di permiso. E obhetivo ta pa inventarisa con e sistema di permiso por keda optimalisa y cua mehoracion mester bin. “Tin hopi di e condicionnan no ta di e tempo aki mas. Economia local y internacional a cambia y e rekisitonan ya no ta aplicabel mas,” e Minister a bisa.

Un ehempel di e ley anticua riba entre otro un vestigingsvergunning ta cu e compania mester tin 60 porciento di su accionnan den man di un persona local, pero practica ta cu ta traspasa e propiedad economico y e local ta keda unicamente cu e propiedad huridico. Esey no ta logra obhetivo pa e participacion di local den e mundo di negoshi. Mester reevalua e reglanan aki pasobra nan ta stroba un mercado agil. Mesun cos ta conta pa e LTU, cu ta e Ley Admision Expulsion Stranhero cu trece hopi complicacion pa un compania por nombra un Director externo.

Pa logra ehecuta e proyecto aki mester di un experto huridico pa dirigi e trabaonan, cu mester ta cla den 12 luna. Wever a bisa cu ta spera di haya asistencia tecnico di Hulanda pa yuda e expertonan huridico local. En principio Aruba lo carga cu e gasto, calcula na 150 mil florin.

OneStopShop di berdad

Proyecto dos ta un structura di permiso coherente tras di un solo loket, e OneStopShop. Segun Minister Wever, e proyecto dos no por cuminza si e prome proyecto no ta cla. “Ora cu e comerciante kier pidi un permiso e ta bay un solo caminda, un solo loket pa entrega su peticion y documentonan, pa por ricibi permisonan pa cuminza negoshi. E proposicion ta cu e loket aki ta na Departamento pa Asuntonan Economico. “Cu e loket aki, ya e empresario no mester bay DIMAS, of DVG pa tur otro permiso. Hopi di e investigacion a mustra cu e proceso di pidi permiso na Aruba ta demotivante, e ta trece stress y gasto adicional. Si bin cu un sistema integra, ta haci e hacimento di negoshi mas facil.”

 

E loket lo ta digital, unda tur e documentacion lo keda registra. Lo mester tene cuenta cu e logistica y determina ken ta responsabel y unda e ta ubica. Ademas mester bin un infrastructura digital cu integracion sea di e departamentonan of toch cu cada Ministerio ta keda cu su maneho. Aunke e di dos lo rekeri mas coordinacion, e ta un mehoracion pa empresarionan compara cu awor. E proyecto aki lo tuma 18 luna, cu ta inclui asistencia externo y lo costa 200 mil florin.

Concurencia husto

Proyecto tres ta implementacion di e Aruba Fair Trade Authority, AFTA, cu ta un identidad independiente riba su mes y ta opera separa di Gobierno. Su obhetivo ta pa yega na concurencia husto (fair level playing field) y eliminacion di formacion di cartel na Aruba. “Implementacion di e Fair Trade Authority lo contribui na un mercado mas dinamico y honesto,” Wever a bisa Parlamento e siman aki. Ambicion ta cu despues cu cuminza cu e aspecto di concurencia husto, pa introduci e aspecto di Proteccion pa Consumidor despues di tres aña. Intencion ta pa tur e companianan di utilidad cay bao di e AFTA. “Na e momento aki Proteccion di Consumidor mester haya atencion, ya cu hopi consumidor no ta ni na altura di derechonan cu nan tin. No tin ningun instancia pa yuda consumidor cu no ta Corte. Tin e structura legal, pero e mester haya su bida,” Minister Wever a sigui splica. E organo ta parti di e landspakket, pero no e Proteccion na Consumidor – sinembargo esaki ta un aspecto crucial den henter e maneho pa yega na concurencia husto.

A cuminza cu e procedura pa busca hurista y economista den Gobierno pa haci e trabao aki, bao guia di experto di Hulanda cu tin e conocemento debido. Unabes e trabao preparatorio ta cla lo busca e Director.

E gasto pa lanta un Aruba Fair Trade Authority ta hopi mas grandi compara cu pa e otro proyectonan. E trabao lo duna 12 luna, y e inversion inicial lo ta riba 750 mil florin y lo yega te na 1.12 miyon florin. Manera a bisa ayera caba, Aruba a haci peticion caba na COHO pa subsidia e proyecto aki.

Habri cuenta di banco

E di cuater proyecto cu kier ehecuta ta pa habri cuenta di banco. Dificil pa kere cu habri cuenta di banco ta rekeri un atencion specifico, pero tin hopi reclamo cu tin hopi tardansa pa comerciantenan por habri nan cuenta bancario. E recomendacion di EBA ta cu habri un cuenta bancario mester sucede a base di un analisis di riesgo, cu por tuma luga mucho mas lihe. A recomenda un grupo di trabao entre Banco Central y banconan local pa mira con por acelera e procedura. E trabaonan mester desemboca den un protocol concreto, cu awendia por tarda pa lunanan.

Pero parti di e proyecto cuater aki ta pa percura cu tur hende tin cuenta di banco. Te ainda 10 a 12 porciento di hendenan na Aruba no tin cuenta bancario. Nan mester haya derecho pa por habri un cuenta bancario door di pone cu mester tin un suma mas chikito (cu awor) riba e cuenta y baha e exigencia di cumplimento. Ta papia di cuentanan bancario cu no ta surpasa 2000 florin. “Tin trabaonan cu a tuma luga caba riba e tereno aki.” E protocol mester ta cla denter di 6 luna y tin un suma di 100 mil florin calcula pa un Director externo pa guia e proceso.

Mandato

Wever a sigura cu e enfoke di e trabao ta e implementacion di recomendacionnan. E structura di e proyectonan di reforma aki cu ta cay bao di landspakket ta Hulanda, despues Minister pa Asuntonan General y Secretario di Estado di Hulanda pa Relacionnan den Reino, kendenan ta duna un mandato na Minister Asuntonan Economico pa ehecuta cu e procedura y otro Ministernan ta duna espacio na e proceso cana agil. E Minister lo traha cu un grupo di guia, bao Direccion di Asuntonan Economico, y di esey lo bin e cuater proyectonan.

Geoffrey Wever a bisa Parlamento cu e landspakket riba su mes no ta bay soluciona tur problema y cu e cuater proyectonan cu a scoge a base di recomendacionnan ta necesario pa crea un bon base pa sector priva por continua. “Ta expertonan di EBA ta bisa esey. Mi ta de acuerdo cu no ta pasobra tin bon permiso regla, economia por mehora. Esey riba su mes ta logico, pero pa ideanan por funciona mester tin procesonan y pa aña no atende cu nan. P’esey lo percura pa base solido, pa di e forma aki ora inversionista di afo kier inverti nan lo por haya ‘red-carpet.’”