Diabierna ultimo Minister di Finanzas y Cultura, Sra. Xiomara Maduro, hunto cu Minister di Turismo y Salud Publico, Sr. Dangui Oduber y CEO di Aruba Tourism Authority (ATA), Sra. Ronella Croes a anuncia celebracion di un “Parada Nacional di Luz” cu ta bay tuma luga diasabra 26 di februari, pa asina cende e mecha pa e celebracion di Carnaval 2023.

E noticia aki a trece diferente tipo di reaccion den comunidad, specialmente mirando cu Aruba a caba di pasa den un ola di contagio di e variante Omicron cu a kibra recordnan, e pais ta den un situacion precario financieramente y presupuesto 2022 mes ainda no a wordo aproba.

E anuncio aki a causa conmocion tambe pa motibo cu a hacie riba e mesun dia cu gobierno tabata den corte den un caso sumario cu nan a entama contra sindicatonan SIMAR y SEPPA, unda cu e sindicatonan ainda ta luchando pa elimina e recorte salarial di 12.6%.

Sra. Josephine Albertus, presidente di sindicato SIMAR, a manda ayera dialuna un carta oficial pa Minister President, Sra. Evelyn Wever-Croes, expresando nan preocupacion y decepcion pa loke ta trata e anuncio di e “Parada di luz 2022”.

Den e carta, Albertus ken ta papia den nomber di e directiva di SIMAR, ta indica cu nan ta haya e ta “asombroso cu aparentemente e prioridadnan ta diferente cu esun di e sectornan, unda e necesidadnan ta mas grandi”.

Como e sindicato cu ta representa un cantidad grandi di maestronan na Aruba, el a enfatisa cu e sector di enseñansa a carece di e inversion necesario durante e ultimo añanan den diferente area, infrastructura deficiente, recepcion y supervision adecua pa e studiantenan, recursonan educativo cu no ta suficientemente disponible, entre otro.

“Aparentemente hopi persona no kier reconoce cu e maestro/docentenan cu tin cu realisa nan tarea principal di brinda educacion diariamente, ta bao un gran presion laboral. Nan ta haya nan mes obliga di asumi otro tareanan tambe”, e carta ta señala.

Albertus ta remarca den e carta tambe cu ta tristo pa wak cu ora cu mester duna prioridad hopi necesario na inversionnan den e sector di enseñansa, y mester tambe haci recortenan den e presupuesto pa educacion, financiamento si ta disponibel den otro areanan y si ta wordo considera un prioridad.

Den e carta tambe SIMAR no kier a keda sin menciona algun cambio y problemanan actual cu tin mas prioridad cu e celebracion nacional. Por ehempel e cambionan den e pakete di AZV, cu pa e personanan mas vulnerabel lo causa mas desbentaha, como tambe e problema actual hopi grandi cu e planta di RWZI cu tin mester di solucionnan structural pronto.

“E ta incomprendibel y inaceptabel pa permiti cu e actividad “Parada di luz 2022” tuma luga, unda cu ta perde completamente di bista e realidad di e estado actual di e situacion”, Albertus a expresa.

Por ultimo e directiva di SIMAR a haci apelacion na Minister President pa reconsidera firmemente e prioridadnan y lo ta en espera di un contesta di Minister President.