(AP) – SpaceX su Elon Musk a bisa diahuebs cu e prome vuelo orbital di su nave espacial, cual ta esun mas poderoso cu a yega di ser construi, lo yega den e siguiente lunanan.
Mientras cu e ta anticipa fracaso, e tin confiansa cu Starship lo yega su destino pa fin di e aña aki.
Musk a papia tocante su prome gran actualisacion di Starship den mas di 2 aña mientras cu e tabata para banda di e nave espacial di 119 meter na SpaceX Texas. El a urgi e audiencia pa “haci esaki un realidad!”
“Esaki ta algo hopi increibel,” el a expresa. “E ta dificil pa kere cu e ta real.”
NASA tin plan di usa e nave aki Starship pa baha astronautanan na e luna pa aña 2025. Mientrastanto, Musk ta spera di por manda un gran cantidad di e nave aki pa crea un ciudad riba e planeta Mars, cuminsando na manda material, ekiponan y despues personanan aya.
Pa awo, e vuelonan inicial lo carga Musk su satelite di internet yama Starlinks te espacio y laga nan aya.
SpaceX ta wardando pa haya aprobacion di Federal Aviation Administracion prome cu nan continua cu Starship su proximo fase, cual lo ta di drenta espacio. Musk a comenta cu e ta spera di por cuminsa cu esaki na Maart y cu e nave lo ta cla pa biaha den e tempo aki tambe. Esaki lo pone e lansamento di e nave espacial den e proximo lunanan.
