(CuraçaoChronicle) – Durante nan ultimo reunion, Conseho di Minister di Corsou a adopta e Ordenansa Nacional, e prome tranche di optimalisacion pa entidadnan afilia na gobierno. Esaki a keda anuncia pa minister di Finanzas, Javier Silvania. Tambe a manda e ley pa Parlamento pa aprobacion.
Pa por bin na remarca pa sosten di likides for di Hulanda, gobierno di Corsou mester a reduci salario. Esaki a keda acorda den e landspakket. E ley en cuestion ta nifica cu for di awo, oficialnan top den entidadnan di gobierno por gana un maximo di 263mil florin a base anual for di un trabao full-time. Den caso di un trabao part-time, e suma aki ta aloca den proporcion na e orario di trabao.A demas, ta paga un maximo di 88mil florin na momento di termina e contract laboral.
E limite di 263mil florin tambe ta aplica si e oficial top ta eherce varios funcion. E salarionan di ehecutivonan top kende actualmente ta gana mas, ta bay keda reduci den tres parti igual dentro di un periodo di dos aña.
Reduccion temporal
Cu entrada na vigor di e ley aki, e salario di e personal di entidadnan di gobierno tambe ta bay keda reduci temporalmente cu 12.5 porciento pa aña. E deduccion aki no ta aplica na personanan cu ta gana menos cu 125 porciento di salario minimo, de lo contrario, e reduccion lo conduci na un salario di menos cu 125 porciento di e salario minimo aplicable den e aña en cuestion. Esaki ta nifica cu pa aña 2022, e reduccion no por resulta den un salario cu ta menos cu 2,082.73 florin pa luna pa empleadonan mayor di 21 aña di edad trahando cuarenta ora pa siman. E reduccion di 12.5 porciento no ta aplica na empleadonan cu ta gana 2,082.73 florin pa luna of menos.
Segun ley, e reduccion di 12.5 porciento ta bay caduca dia 30 di juni 2023 a mas tardar.
Dentro di dos aña despues cu e ley aki drenta na vigor, e ministernan mester reporta na parlamento riba e efectividad y efectonan di e Ordenansa Nacional aki den practica.
