Habri un hotel adecuadamente… Ni esey por bon …?

Un di e sorpresanan e siman aki tabata e decision di huez pa para e construccion di e hotel na Sero Colorado, den e caso cu habitante di e bario y otro entidad a entama contra gobierno. Gobierno ta haya tres luna pa atende e obhecion di e habitantenan, di cual no tur a ser considera accesible den e caso, na un manera debido.

Aki por conclui cu, riba e demanda di e habitantenan, ya caba tin un decision di huez cu ta tira un luz menos positivo riba e manera con gobierno, y diferente entidad gubernamental envolvi den e asunto, ta opera. Puntonan trata extensamente den e caso ta por ehemplo cu gobierno a keda nenga di duna e habitantenan copia di e plannan, pa nan por argumenta detayadamente den e asunto. Huez a haya cu nan tin e derecho ey, pasobra pa bo argumenta bon riba un decision bo mester conoce e trasfondo di e asunto. El a mustra den su veredicto riba articulo 19 inciso 1, di LAR, lesa en conhunto cu articulo 13, prefacio y bao punto b, cu ta bisa cu pa entrega un obhecion mester indica e decision y si ta necesario entrega copia di esaki. Esaki ta un punto importante general cu lo tin importancia pa otro caso den futuro tambe, pasobra e ta mustra gobierno riba e obligacion di permiti esnan cu ta haci obhecion tuma nota di contenido di e disposicion y e documentonan relevante den esaki.

Tambe a constata cu e evaluacion cu mester a haci pa finalmente otorga e permiso di construccion no a cana bon. Esaki den sentido cu huez tabata duda si instancianan cu mester a duna nan ‘visto bueno’ na e plan a haci nan trabao debidamente, simplemente firmando e lista di instancia cu mester aproba, pero sin haci e trabao debido di evaluacion. Asina huez ta referi na e Welstandscommmissie, cu a djis pone un firma riba e formulario cu ta pasa rond y supuestamente tur ta basha firma pa den tempo record cos keda cla. Y nan ta bisa cu ta asina nan ta traha…

Y ta haya straño cu un huez ta puntra su mes ta ki manera di traha esaki ta? Esaki ta propio di un republica bananera, unda e pandiya na poder ta dicta con halto e instancianan gubernamental mester bula. Awor nos ta comprende ta con a yena Aruba cu un monton di bunker Chines, unda no por descubri ningun arquitectura aceptable, ni intento di esey, ningun contribucion na mantene un cierto cultura den construccion cu nos indudablemente tabatin. Pa refresca memoria, tempo cu den añanan 30 y 40 di siglo pasa a construi hopi edificio comercial, na San Nicolas y na Playa tambe, a haya hopi inspiracion di e estilo ‘Art Deco’ cu a surgi na varios pais, y despues entre otro a haci Miami famoso. No bin bisa anto cu no ta importa ta kico comercio ta construi, djis firma y laga nan construi…

Otro punto importante den e caso aki ta e reglanan defini pa e ley di Planificacion Teritorial (ROP, cu su detayenan pa cada zona den e ROPv, unda e propio gobierno a pone un limite di 600 camber, y ta bay di acuerdo, manera ampliamente publica, cu den un siguiente fase ta traha 300 camber mas. Kico ta e idea aki? Cu ta formula cierto exigencia pa construccion den e area aki, anto ta priminti un desaroyador cu e por wel di dal bay, pasobra ‘despues nos ta cambia e ley toch…? Esey si lo ta un manera sofistica di tuma hende haci; formula plan, tene ‘inspraak’ pa tene ciudadania contento, pa despues dobla e asunto toch manera e desaroyador kier? Nos tin e temor cu nan tin razon cu un ‘approach’ asina, pasobra di e parlamento aki no por spera nada mihor di loke nos a mira den pasado; esey di dia a forma gabinete te awe a bira bon cla: lo bula mes halto cu e mandatarionan ta exigi. Den e sentido ey nada a cambia: den cada partido e ‘top gun’nan ta bira ministro y e segunda tanda, pa nos no duna nan un nombe mas denigrante, no por y lo no kier haci nada otro cu bisa ‘Sí’.

Cu tur e bochincha aki, algo sustancial ta bay cambia? No, gobierno por atende e obhecion na un manera drechi, loke nan por a haci di biaha tambe, y ta pone e obhecion un banda, pa despues probablemente bolbe haya caso den corte contra e decision specifico ey. Pero a lo largo, e construccion di e 600 cambernan lo sigui. Y esey ta trece nos riba un otro angulo pa contempla e caso. Ora ta papia di desaroyo en general di henter e parti di e isla ey, no ta trata solamente di construccion di un hotel, sino claridad riba e asunto di e refineria. No por sirbi tur dios pareu y mester scoge. Ta existi tal plan integral? Si e t’ey, anto e ta e secreto mihor scondi di Aruba. Loke nos ta mira ta cu miles di camber di hotel, incluyendo e 600 o 900 aki, ta e unico plan di desaroyo economico de hecho presente; nada nobo… E resto ta un lista patetico di ‘fata morgana’ di innovacion y algun palabra mas di moda actual, cu no ta yuda pa nada…