E rijkswet pa institui COHO, e organisacion Caribense pa Reforma y Desaroyo ta cla y awor ta na Parlamento, y ta Su Mahestad Rey Willem-Alexander, pa medio di Gobernador di Aruba a presenta e ley na Parlamento ayera. E ley a drenta bao nomber di Secretario di Estado pa Asuntonan di Reino.
Manera ta conoci, e rijkswet aki ta basa riba e pensamento cu e paisnan di Reino lo traha hunto pa implementa reformanan na nivel administrativo, y realisacion di finanzas publico duradero, ademas di fortifica resiliencia di economianan di e paisnan. COHO mester asisti den e proceso aki, y tabata un condicion di Hulanda mara na e sosten di emergencia cu a duna Corsou, St. Maarten y Aruba, despues cu e pandemia COVID-19 a crea un crisis economico, financiero y social pa e paisnan.
E rijkswet COHO tin su base riba articulo 38, inciso dos di Statuut y lo ta un organo administrativo cu tareanan independiente y autoridadnan, pa brinda e sosten na reformanan.
E rijkswet ta uno di 36 articulo cu ta splica e terminonan cu ta usa den e ley, e tareanan di COHO y su obhetivo, cu ta yuda e paisnan pa implementa reformanan, realisa finanzas publico duradero y saludabel, incluso yega na e base legal necesario.
Den cuadro di esaki, COHO mester sostene e desaroyo y ehecucion di proyectonan, programa y medidanan pa organonan di Gobierno y companianan publico relata na e temanan describi den e landspakket, cu ta amplia den un agenda di ehecucion, ademas, unda cu mester, un plan di accion. COHO lo no asumi autoridad cu ta di e pais.
Articulo 5 ta referi na e landspakketnan cu ta acuerdonan cu cada un di e paisnan a sera cu Hulanda. Y cada uno ta un pakete coherente di obhetivonan di maneho strategico, reforma y inversion dirigi na logra e meta, y tin di haber cu maneho financiero, e costo y efectividad di sector publico, belasting, sector financiero, reforma economico, cuido, enseñansa y fortificacion di estado di derecho.
Articulo 6 ta regula e agenda di ehecucion, cu ta un tarea conhunto di COHO y Minister pa Asuntonan General y e progreso ta evalua door di COHO. Minister di Asuntonan di Reino di Hulanda lo por duna instruccion na COHO, despues di deliberacion cu Minister di Asuntonan General ora ta trata un agenda di ehecucion.
Si e Parlamentonan ta desea, un of mas miembro di COHO lo por brinda informacion un biaha cada tres luna riba e trabao cu nan ta haciendo.
Bon Dia Aruba lo amplia riba e ley aki, ademas di e conseho di Raad van State , cu inicialmente tabata critico riba e poder di COHO y cu despues di su observacion, a bin cambionan den e rijkswet.
Mester bisa cu e Rijkswet Aruba Financieel Toezicht, Raft, tambe ta cla, desde September 2021. E temanan aki lo keda discuti durante e bishita di e Secretario di Estado pa Asuntonan di Reino Alexandra van Huffelen, kende lo ta na Aruba otro siman.
