“Nos no ta contra hotel, pero si mester cumpli cu ley”

DOW ta di opinion cu Secrets Aruba ta cumpli cu e ROPV, esta e plan di ordenanza teritorial cu regla, pero consideracionnan di Huez de Haseth di LAR, ta mustra cu tin duda serio den e cumplimento aki.

Segun e habitantenan cu a lanta e caso contra Secrets Aruba na Sero Colorado, nan no ta contra e construccion di Secrets, no ta contra e proyecto riba su mes, pero nan kier pa cumpli cu ley.

Den e caso argumenta na Corte Administrativo, LAR, abogado Maritza Boyce a bisa cu e plan di construccion no ta cuadra na exigencia rasonabel di ‘welstand.’ Esaki ta e termino cu ta usa si un edificio ta cumpli cu cierto norma of no. Mr. Boyce a referi aki na un conseho di arkitecto Leo Ponson di 2 di December di 2020, unda entre otro e ta conclui cu e plan, den relacion cu e caracteristicanan di e edificionan/construccionnan existente, e espacio publico y e paisahe natural, tumando na cuenta e masa, structura, escala, detaye y escogencia di material y coherencia di e construccion, ta daña e ambiente pa tur. Huez a tuma e punto aki den su consideracionnan.

Gobierno a argumenta cu e plan di construccion ta cumpli na exigencianan rasonabel di welstand.Y a basa e argumento aki riba un conseho di welstand commissie di November 2018. Sinembargo segun e abogado, basa riba e documentonan presenta pa Gobierno, e conseho di welstand commissie tabata uno proforma y practicamente a djis haya un stempel di aprobacion.

E abogadonan di Gobierno a admiti cu e comision no a duna un conseho sino mas bien a duna aprobacion door di pone nan firma riba e formulario corespondiente. Cu esaki den bista, y cu conseho di experto por bisa cu e permiso di construccion, esta e bouwvergunning 0994 -2019 den apelacion no ta suficiente cu unicamente referencia na e conseho di stempel.

Habitantenan ta argumenta cu edificio ta surpasa e haltura maximo permiti, pasobra durante e calculacionnan incorectamente no a tene cuenta cu e espacio bao tera di cuater meter, cu ta e nivel di e klip.

No por a lesa e mapa, esta e bouwtekening presenta pa Gobierno, sigur no e cifranan. Habitantenan mes a laga traha e calculacionnan basa riba e mapa, unda segun nan, e conclusion ta cu e haltura di e construccion ta keda surpasa. Despues di a ricibi e version digital por a saca afo kico e haltura lo por ta. Sin ningun otro motivacion no por determina si ta si of no, ni pakico e plan di construccion ta cumpli cu e exigencianan di e ROPv, mirando cu e documento aki tin definitiebepalingen y meetvoorschriften.

Consecuentemente, e habitantenan ta argumenta cu e bouwplan a base di su ubicacion of sistema di construccion lo ta un estorbo grandi pa e ambiente. Riba dje nan ta argumenta cu despues cu realisa e construccion, mirando e ubicacion y su forma of sistema di construccion entre otro lo kibra e bista y privacidad di e habitantenan. E plannan ta mustra cu e edificio ta hopi cerca di nan percelanan y cu e edificio lo ta di diferente piso, esta lo ta un edificio masivo. Consecuentemente e probabilidad ta grandi cu for di e edificio di Secrets lo por wak den tereno di e habitantenan, cu alabes ta perde nan bista.

Contra ROPV

Habitantenan ta argumenta cu e bouwplan ta contra ROPv, den sentido cu e percela ta destina pa construccion di un hotel di maximo 600 camber. For di e situatie tekening y condicionnan general di e otorgamento di e tereno erfpacht por saca afo cu e intencion ta pa pone un edificio di 900 camber.

Huez a reconoce cu e argumento aki ta cuadra. Pasobra ora di toets un bouwplan na e ROPV, no solamente mester mira si e construccion ta pas den e destinacion asigna pa e ROP, pero tambe mester evalua si e edificio lo ta construi segun e ROPv. E conflicto di uso di e destinacion ta existi na momento cu ta supone na forma razonabel, cu e structura lo keda usa exclusivamente of parcialmente pa otro meta, cu esun cu locual e uso di e tereno ta destina p’e.

Articulo 23, inciso 1 di e ROPV ta bisa bon cla cu e percela ta pa un hotel cu maximo 600 camber. Riba e bouwvergunning di Secrets cu su ‘situatietekening,’ banda di e permiso pa 600 camber di hotel, tambe a otorga un permiso pa un expansion den futuro cu otro 300 camber di hotel. E expansion aki ta riba e bouwtekening.

Mas ainda den e acta di erfpacht a pone como condicion cu pa loke ta e destinacion di e erfpacht na e doño di e permiso ta conta cu e percela , sin permiso di Gobierno den futuro pa no por usa e tereno si no ta pa ta doño di, of opera un hotel resort di maximo 900 camber conforme e bouwvergunning cu DOW ta duna.

Bao capitulo B di e determinacion den e acta aki ta bisa cu e construccion di e proyecto di hotel lo sucede den dos fase, esta den e prome fase lo construi 600 camber pa un proyecto di hotel all inclusive cu su facilidadnan y despues di un periodo di transicion di dos aña lo construi e di dos fase di 300 camber di un European Plan Hotel cu su propio facilidadnan. Mirando esaki, tambe teniendo cuenta cu articulo 31.5 di ROPV, ta mustra cu razonablemente lo por asumi cu e construccion of edificio lo ta usa pa otro metanan cu locual ta determina, consecuentemente mester nenga esaki basa riba ley.

Autoridadnan ta keto

A acerca Director di DIP, dr. Haime Croes kende a bisa cu huez a instrui cu mester reevalua e bouwvergunning. Pero cu DOW no ta di opinion cu plan di construccion manera e ta awor, ta contra e ROPV. Dr. Croes ta kere cu mester warda e motivacion di DOW.

Bon Dia Aruba a tuma contacto cu Ing. Marlon Croes di DOW kende a reacciona bisando cu no mester kere e argumentonan cu e habitantenan a trece dilanti. Sinembargo te na ciere di nos edicion, e Director di DOW no a splica kico ta e argumento robes cu a presenta dilanti LAR.

Di su banda, Prome Minister Evelyn Wever Croes, no a contesta ningun di e preguntanan di Bon Dia Aruba riba e sentencia aki, cu ta bisa cu Gobierno tin tres luna pa responde na e obhecion di e habitantenan.

Mester bisa cu e ROPV ta basa riba e Ley Ruimtelijke Ordening, LRO. Y segun e LRO, mester adapta na exigencianan di e Plan di Ordenanza Teritorial hasta prome cu e ROPV drenta na vigor. E ley ta brinda espacio pa dispensacion, esta pa desvia di e ROPV, sinembargo esaki mester sucede na comienzo di e proyecto y esun cu tin cu pidi e dispensacion ta e desaroyador, no Pais Aruba. Gobierno den e caso aki, no por pidi un dispensacion na su mes pa un proyecto priva.

Minister di Desaroyo Teritorial, Infrastructura y Medio ambiente (mr. Evelyn Wever Croes) tabata representa pa abogadonan mr. Emerencia, mr. Geerman y mr. Poeran di DWJZ (Departamento di Legislacion y Asuntonan Huridico), mientras cu e partido interesa cu ta Three Rivers Real Estate tabata representa pa abogadonan di e bufete Croes, Wever & Ruiz, mr. Reinkemeyer y mr. A. Ruiz.