(AP) — Un medico forense na Florida a bisa diahuebs cu comediante Bob Saget a fayece di un golpi accidental na su cabes, probablemente pa un caida.
Dia 9 di januari ultimo a haya Saget morto na un camber di hotel na Florida. El a duna un presentacion den e area e anochi prome como parti di un tour di comedia stand-up.
Un analisis di toxicologia no a mustra ningun droga ilicito of toxina den curpa di Saget, segun un declaracion di medico forense Joshua Stephany na Orlando.
Un rapport di autopsia revela diahuebs a mustra cu Saget tabatin un rasca na su cuero di cabes, un fractura na base di su craneo, fractura rond di weso di su wowo, sangramento entre cerebro y tejido cubriendo e cerebro, como tambe blousa na e cerebro. Saget tabata positivo pa Covid-19 pero no tabatin inflamacion den su sistema respiratorio, segun e reporte.
“Probablemente el a sufri su heridanan door di un caida sin testigo”, e declaracion a bisa. “E forma di morto ta un accidente.”
Conclusion di e medico forense a keda anuncia prome pa famia di Saget riba diaranson. “Autoridadnan a determina cu Bob a fayece di trauma na cabes”, nan declaracion a bisa. “Nan a conclui cu accidentalmente el a dal parti patras di su cabes riba algo, no a pensa nada di esey, y a bay drumi. No tabatin droga of alcohol involucra.”
E comediante di 65 aña di edad a ser haya riba su cama di hotel na e Ritz Carlton na Orlando. Un security di e hotel a drenta e camber despues cu Saget no a check out, y a yama 911. No tabatin señal cu un crimen por a tuma lugar, autoridadnan a bisa luna pas.a
Miho conoci pa su rol como tata stima Danny Tanner riba e serie ‘Full House’ como e anfitrion dibertido di ‘America’s Funniest Home Videos’, Saget tabata casa cu Kelly Rizzo Saget y tabatin tres yiu muhe di un matrimonio anterior.
Saget tabata riba caminda como parti di su ‘I Don’t Do Negative Comedy Tour’, y a bisa tiki prome cu su morto cu el a disfruta recepcionnan caluroso di audiencia na Orlando, y e area di resort Ponte Vedra Beach.
“Mi ta back den comedia manera mi tabata tempo cu mi tabatin 26. Mi ta kere mi ta hayando mi stem nobo y stimando tur momento di esaki”, el a post riba Instagram.
Morto di Saget a genera un fluho di afecto di fanatico- y coleganan, kende a record’e tanto como pret y extraordinariamente amable. Su famia a bisa cu nan tabata abruma y consola pa ‘e increible entrega di amor for di fanaticonan di Bob’.
“Mientras nos ta continua nos duelo hunto, nos ta pidi pa tur hende corda e amor y harimento cu Bob a trece na e mundo aki, y e lesnan cu el a siña nos tur: trata tur hende bon, laga e hende cu bo ta stima sa cu bo stima nan, y enfrenta temponan dificil cu brasa y harimento”, su famia a bisa.
