Ayera mainta alrededor di 9am, trahadornan di seccion di Food and Beverage di hotel Holiday Inn a stop nan trabao, pa motibo cu nan ta malcontento cu e maneho di Service Charge, unda nan no kier pa tres manager haya beneficio di esaki.
Segun informacion cu a circula den varios medio di comunicacion local ayera, Sandra Curtis Lacle, gerente di Recurso Humano na e hotel, a informa cu ya nan tabatin acuerdo pa awe diabierna vota riba un CAO nobo, pero pa su sorpresa, ayera e trahadornan a bin cu accion. Curtis Lacle a indica cu e protesta a afecta e servicio di desayuno pa e huespednan di e hotel.
Sindicato FTA cu ta representa e trahadornan a indica cu e trahadornan tin malcontento pa un parti specifico di e CAO cu ta negociando, cual nan kier elimina. Ta trata aki di un parti cu ta duna managernan participacion den e tips cu e trahadornan ta ricibi, basa riba un sistema di punto. E trahadornan a indica cu nan no ta haya cu ta husto pa managernan tambe ricibi tips asina.
Pero ya pa 11am nan a bolbe sinta na mesa cu gerencia, y pa ayera tardi a ricibi informacion cu e partidonan a yega na un acuerdo temporal. Den esaki, mita di e puntonan cu tabata bay pa e managernan, ta bay back na e trahadornan.
Awe e trahadornan ta bay vota riba un CAO nobo, y si nan bay di acuerdo, pa otro siman esaki lo keda oficialisa.
Potret via 24ora.
