Den e prome conferencia di prensa cu director y manager comercial di Setar a ofrece ayera atardi, nan a trece dilanti informacion tocante proyectonan cu nan tin cu diferente scol pa fibra optica. Ademas a keda conoci cu nan ta considera cu ta imposibel pa nan por evita pa incidentenan di vandalismo tuma luga.

Roland Croes, director di e compania, a splica cu manera cu añanan ta pasa e tecnologia ta cambia y pandemia di Covid-19 tambe a influencia den esaki. A bira hopi necesario pa hende traha na cas y hopi scol a wordo cera pa via di pandemia, loke a causa hopi presion pa companianan di telecomunicacion.

Na Aruba tin presion basta halto, unda cu a subi e trafico cu un minimo di 33%, loke a crea un demanda y hunto cu esey a pone presion riba structura tambe. Na e momento ey a bin dilanti cu muchanan mester cuminsa haya les na cas, poniendo presion riba scolnan cu tin cu bay duna les online.

Croes a señala cu na 2020 nan a cuminsa haci contribucion den area di Enseñansa pa asina muchanan por tin mas acceso na internet, por haci nan lesnan for di cas, unda cu nan a duna aproximadamente 800 tablet.

Den a parti aki, e compania a dicidi di dal un stap dilanti unda cu nan ta bay ofrece na tur scol di Aruba e tecnologia di fibra optica. “Cu esaki nan tambe por cuminsa set up nan sistema di online learning”, el a declara.

El a informa cu scolnan ya caba a haya un carta, nan a cuminsa cu scolnan secundario y despues nan ta bay continua cu e otronan te yega na scolnan primario, manera Croes a señala, agregando cu esaki no ta bay stroba e comunicacion cu internet. Nan a calcula aproximadamente 100 conexion cu ta bay wordo conecta.

Inversion

Aparte di e proyecto aki dirigi pa scolnan, Croes a comenta cu pa loke ta trata pandemia, esey ta pone mas velocidad ainda na e forma cu hende ta haci cosnan. Por ehemplo, el a splica cu na e momentonan aki nan ta tumando decisionnan basta drastico cu cosnan ta bay aumenta y esey ta inversionnan den cierto parti di e red.

“Nos mester cumpli cu e demanda cu nos ta mira cu no ta bay baha nunca mas, ta al contrario, ta bay subi drasticamente y vooral pa video, cosnan cu no tabata pasa 10 aña atras”, Croes a bisa.

Den e netwerk e aña aki nan ta bay traha duro y pa cuminsa nan ta bay zorg pa tur cas y tur hende haya IPTV. Tin miles di hende caba cu a bay over, pero papiando di netwerk henter, ora tin fibra optica ta sigur cu personanan ta bay tin IPTV. Nan a pone esey den e red di kabel, y asina “poco poco nos ta bay cuminsa set up tur hende riba fiber y subi nan velocidad”, Croes a sigura.

Segun Croes a declara, nan ta pone hopi accento riba stabilidaddi conexion, unda cu den cas of pafo den aire liber cu uso di video y cu un velocidad mas halto, e presion riba un cas tambe ta bay bira grandi pa e tin un red di wifi. E tecnologia ta exigi pa esey tambe tuma luga.

“E ta un trabao enorme, nos tin masha hopi hende trahando riba dje y masha hopi placa ta wordo hinca den dje. Pero e intencion ta cu den añanan cu ta bin ta bay ripara un diferencia basta grandi”, Croes a comenta.

Ademas, el a bisa cu nan ta instalando diferente server na diferente luga pa si na momento cu algun di e partinan ta cay, e servicio por sigui den otro parti. Por ehemplo, si un di e centralnan ta cay, un otro central ta tum’e over y comunidad mes no ta ripara. El a afirma cu e compania ta invertiendo por lo menos 10 miyon e pa por tin no solamente e ruta di fibra, pero ekiponan cu por cambia rapidamente si un di nan ta cay abao.

Kabel submarino

Aparte di fibra y kabelnan local cu Aruba tin, Aruba ta comunica cu henter mundo cu fibra optica. Trinta aña pasa, segun Croes a menciona, tabatin stations, unda cu nan a wordo kita y nan no t’ey mas. Esey ta pa motibo cu for di aña 90 bay dilanti nan a concentra full pa bay riba fibra optica, loke ta nifica cu den añanan cu a pasa, Aruba a participa den diferente proyecto y tambe Aruba tabata doño di e kabel submarino.

Pa kabel submarino, ta companianan cu ta traha cu otro y nan ta dicidi di bin hunto pa pega paisnan of companianan na otro pa por yega Merca, cu hopi biaha ta e centro unda ta comunica cu internet mes, cu por ta Miami of New York unda tur kier yega pa comunica cu mundo.

Den e añanan ey nan a logra pega Aruba den cuater kabel y na december ultimo, un di nan a wordo kita pa via cu cada 25 aña nan ta wordo reemplasa pa otro. Den historia segun Croes a conta, esaki ta di cuater kabel cu a wordo reemplasa pa otro.

Aworaki, tin 3 kabel submarino cu ta sali for di Aruba, unda cu tur di nan ta dobel. Ta trahando pa esun cu a bay di cuater, ta bezig reemplasando den e añanan cu ta bin, y si ta necesario, nan ta bay pone un di cinco cu un inversion di entre 200 pa 300 miyon dollar. Esaki ta haci imposibel cu Aruba, un isla chikito tin e capital ey, pero manera a menciona caba, ta companianan cu ta bin hunto pa traha den esey.

Vandalismo

Den conferencia di prensa aki, a bin dilanti cierto preguntanan tiba diferente aspecto y entre nan redactor di Bon Dia Aruba a puntra Croes tocante e dos incidente di vandalismo cu a tuma luga algun dia pasa, unda cu mayoria di isla a bay plat y a keda confronta cu problemanan di internet. E ultimo tabata na fin di luna di januari, unda cu basta trahadonan hasta no por haya nan salario pa via di e incidente aki. A puntra Croes, con nan ta garantisa cu esaki no ta bay sucede mas?

Pa cu esaki, Croes a enfatisa cu e dianan ey “Aruba no a cay plat. E cos ta depende di ken a cay plat y ken a wordo ‘gehurt’, pasobra sino un otro problema ta bay tin. Pero imagina bo si por ehemplo un banco masha grandi mes a cay, esey a ‘hurt’ un parti di e pagamento. Aruba no a cay plat y no tin ningun compania na mundo cu por evita sabotahe y vandalismo ”.

Tambe a puntra si e persona of personanan cu a crea e par di incidente tin relacion of vinculo cu e compania, manera rumornan ta señala. Croes a expresa cu nan “tin centenares di punto di netwerk y ta imposibel pa por defende bo mes di tipo di vandalismo asina. Loke bo ta haci como compania ta cu nos no a cay, loke a cay ta cierto clientenan depende di cua ruta bo a bay. Y tin diferente parti den un netwerk cu bo por corta kabel.”