Mr. Edgard Vrolijk te ainda no a logra cu reunionnan den Parlamento ta cana segun Reglamento di Ordo

“Ami no ta baha den awa di riool.” Esey ta e filosofia di Parlamentario Aquanette Gunn cu ta sorprendi pa e forma poco gentil di parti di Ministernan di Gabinete Evelyn Wever Croes II ta atende cu Parlamentarionan cu segun Constitucion, ta nan hefe. Y e ta spera cu Presidente di Parlamento mr. Edgard Vrolijk realmente tuma paso pa Parlamento por funciona debidamente.

Durante un entrevista cu Bon Dia Aruba, Aquanette Gunn di fraccion MAS a bisa cu como Parlamentario nobo, su prome lunanan tabata pa orienta su mes y observa con cos ta bay. Y e observacion a trece preocupacion cune.

Desviacion di topico

Locual Gunn a nota cu falta di mantene na topico ta un di e motibonan pakico reunionnan publico ta bira caotico y hasta agresivo. “Esey ta haci cu e reunionnan ta bay den forma ineficiente y inefectivo. E ultimo reunion publico riba e Ley Instalacion Ministerionan, LIM, a dura 14 ora, y si bay analisa cuanto di e 14 oranan ey a keda dedica na e ley mes, e ta minimo. Y p’esey mi ta kere, cu mi ta bay sugeri na Presidente di Parlamento pa bin cu un curso cu caracter di urgencia pa con ta reuni efectivamente (effectief vergaderen) , pasobra ta e tin cu delinea, e tin cu guia y ora cu ta desvia di topico, e tin cu pone nan back riba e carril. Ken cu sea ta e Minister cu ta dunando su disertacion, simplemente e mester contesta e pregunta cu el a haya di un Parlamentario.”

Contesta tecnico

Na Hulanda, ora cu Ministernan contesta pregunta di miembronan di Tweede Kamer, e contestanan ta drenta sin comentario adicional, ni insinuacion, sino dirigi riba e preguntanan. E contestanan por ta hasta hopi largo y detaya. Den otro palabra, e contestanan por escrito di Ministernan Hulandes ta tecnico. Sinembargo, e ultimo contesta por escrito cu e Parlamentario di MAS a ricibi for di Prome Minister Evelyn Wever Croes tabata carece di specificacion y mas bien tabata cu un tono di falta di respet y cu poco informacion.

“Biaha pasa ora cu mi a saca e preguntanan por escrito, mi a dirigi nan pa mandatario sr. Ursell Arends, y na prome instante, mi no a dirigi nan pa Prome Minister. E preguntanan tabatin mas di haci cu integridad. Si e preguntanan no a bay pa e Mandatario corecto, anto e Mandatario mester a notifica ami como Parlamentario cu e preguntanan por escrito a bay pa Prome Minister. Esaki pa motibo cu sr. Arends no tabata forma parti di e Gobernacion ora cu e tema riba cual mi a haci referencia na dje, tabata di tempo di e gabinete anterior.” E tabata basa riba un comunicado di prensa cu Gunn a lesa riba 24ora y “berdad mi a referi na esey, pero e mesun informacion a sali den otro medionan di comunicacion. E solo hecho cu mi a haci e referencia ey, e preguntanan a haya un dinamica totalmente diferente. E forma y tono cu a pone riba papel y a usa durante reunion, unda un Mandatario ta bisa un Parlamentario cua ta e medio cu e mester sigui, no ta su competencia. Nos ta biba den un estado di derecho, un democracia, unda cada persona tin derecho pa haci uso di cua plataforma di informacion cu ta na su parecer. Mi ta haya e forma di contesta asina un falta di respet.”

Falta di respet

Y no ta Prome Minister so ta falta respet cu su forma di contesta. Pasobra Gunn tabata kier cinco contesta explicito di Minister Ursell Arends. “Mi no a haya e contestanan specifico. Mi a haya contesta general, pero no a contesta ningun pregunta specifico. Y e tono di e contestanan no ta uno di respet. Nos ta papia di respet mutuo, pero pa ricibi respet mester duna respet. Y esey no ta locual ta sucediendo awor aki. Practicamente no ta duna Parlamento respet.”

Aquanette Gunn ta ilustra con partido MEP a saca un comunicado pa ataca su persona, unda ta cuestiona su profesionalismo y a bisa ademas cu ora cu lider di AVP, Mike Eman bisa pa e bula, e ta bula. “Kico mi mester deduci di un comunicado asina aki? Na mesun manera cu Prome Mandatario a indica cu ta e ta saca e comunicado di prensa, mi mester conclui cu ta mr. Evelyn Wever Croes, na un nivel asina abao a cuestiona mi profesionalismo pasobra mi ta forma parti di oposicion? Su conclusion ta cu pasobra mi ta forma parti di oposicion, mi punto di bista ta similar cu esun di AVP of Accion21? Den Parlamento, ta dos banda tin. Coalicion ta sinta hunto y oposicion ta sinta hunto. Y segun ami, te asina leu cu ami a usa mi propio medio social, mi no a cuestiona profesionalismo di ningun hende. Ami lo haci pregunta si.”

Y den e caso specifico, Gunn, docente di profesion, a haci pregunta riba apertura di scol na Januari, mirando e contagio halto di COVID-19. “Mi a haci preguntanan al caso riba educacion y e tereno di enseñansa. Mi no a cuestiona ningun persona. Mi a haci pregunta di mayornan cu ta acerca mi y tambe di profesionalnan den veld cu tambe tabatin pregunta, cu mester haya informacion. Cu nos mester traha structura y no ad hoc, esey no ta cuestionamento. Un parti di mi trabao ta pa controla Gobierno y percura cu ta keda skerpi y informa pueblo cu ta su obligacion.”

E liña cora

E Parlamentario di MAS ta sigui mustra con Prome Minister di Aruba no tin respet pa Parlamentarionan. “Durante e reunion publico riba e situacion di e werksternan di scol, mi ta haya e tono di e Prome Mandatario hopi denigrante. Esey ta e palabra cu mi por usa. E ta gusta ‘kleineer’ hende. Por ehempel durante ultimo reunion el a bisa cu e ta sugeri pa nos sigui curso pa asina nos por haya miho bista kico ta nos derechonan Constitucional. Pero a base di e mesun Constitucion, un Prome Mandatario no mester trata Parlamentarionan asina.”

Pa Aquanette Gunn por a ricibi contesta di Minister di Energia, Glenbert Croes e mester a manda dos recordatorio. “El a keda su competencia. Ami no ta bay bisa un Minister con e mester haci su trabao, pero mescos, a base di respet mutuo, un Minister no mester bisa mi con ami mester haci mi trabao.”

E Minister a duna un conferencia di prensa riba Eagle LNG entre otro y segun Glenbert Croes, asina el a contesta. “E ta keda discrecion di Minister pa papia cu prensa. Pero mi ta kere si cu e Minister por duna contesta riba e 20 preguntanan cu mi a manda su persona riba hedging y Eagle LNG. Si e contesta no bin, lo mi sigui record’e riba e preguntanan y haci mi trabao manera mester ta. E trabao di mi no ta pa sigui tur conferencia di prensa di Gabinete Wever Croes Dos.”

Ta obligacion di Minister pa responde na e preguntanan di un Parlamentario, Aquanette Gunn a enfatisa. Ta pa e motibo ey mes cu Sra. Gunn no a aprecia con Minister di Salud Publico, Sr. Dangui Oduber a bisa Parlamentarionan Google un documento cu a pidi p’e. Tabata trata di e rapport ‘Zorg voor Onze Zorg.’

“Ami no ta acepta esey. Si como Parlamento ta haci peticion oficial pa haya copia di e documento ey, ta e Ministerio mester percura pa entrega esaki y no pa duna instruccion pa bay ‘Google e’ pasobra esey ta un falta di respet. Si nos no para fuerte pa e desaroyonan aki, funcionamento di Parlamento lo no mehora. E lo bira pio y practicamente nos lo perde e autoridad. Y esey no ta e intencion. Pasobra Aruba tin un trias politica, unda Parlamento tin un trabao Constitucional.”

Sosten Presidente di Parlamento

Segun Aquanette Gunn, ora cu e ta combersa personalmente cu mr. Edgard Vrolijk riba e problemanan aki, Presidente di Parlamento ta mustra di tin comprension pa e situacion. Ambos ta docente y conoce otro como tal. Pero “mi ta haya toch, cu ora e ta den su funcion di Presidente, atendiendo un reunion publico cu pueblo ta sigui, e ta tuma un otro actitud. E ta manera e ta cambia. E no ta sigui locual ta sirbi den nos Reglamento di Ordo, incluso e imparcialidad. El a priminti cambionan, pero ten a e momentonan aki, pero ora un Parlamentario ta hiba su disertacion, Presidente di Parlamento no ta hala atencion of atende otronan cu ta stroba.”

Segun Gunn, no ta unicamente Parlamentarionan ta interumpi otro, sino Ministernan tambe ta haci mescos, esta papia duro, ta interumpi y tira palabra durante cu un Parlamentario ta hiba su discurso. “E televidente of esnan cu ta sigui e reunionnan via otro medio no ta mira e dinamica aki, pero mr Edgard Vrolijk si. Abo ta Presidente y abo mester salvaguardia y percura cu den cas di pueblo, orden ta prevalece. Y esey mi no ta sinti ainda,” ta e conclusion di Gunn.