(NLTimes) – Amsterdam kier obliga doñonan di vivienda baha e prijs di huur pa por combati e vacaturanan cu tin hopi tempo caba riba mercado.
E proposicion di obliga e personanan aki ocupa nan casnan lo mas pronto posibel ta lo cay bao di consulta publico dia 17 di februari, e ciudad a bisa den un comunicado di prensa.
“Nos ta den medio di un crisis di vivienda, y e ta imposibel pa splica cu tin casnan innecesariamente bashi pa motibo cu, por ehempel, e huur ta demasiado halto of pa motibo cu e doñonan ta warda demasiado tempo pa renobacionnan,” Jakob Wedemeijer ken ta encarga cu vivienda a declara. “Cu esaki, nos por forsa e doñonan huur nan casnan na un prijs cu ta basa riba e mercado. Si no tin demanda pa propiedadnan caro, e huur simplemente mester baha.”
E regla nobo aki ta posibel danki na e Crisis and Recovery Act. Amsterdam por usa e ley aki pa obliga e personanan haci nan cas apto pa biba aden dentro di un cierto periodo di tempo. E ciudad tambe por obliga doñonan aplica pa un permiso temporario di huur pa solamente e casnan cu no lo ser renoba pa un tempo largo por ser ocupa mientras tanto.
Si e medidanan ser viola, e municipalidad por duna e doño di e cas un boet. Prome cu e Crisis and Recovery Act, doñonan di propiedad por solamente ricibi boet si nan no reporta cu un persona a huur e vivienda.
Tambe Amsterdam lo implementa un proteccion di compra riba casnan cu balorisa na alrededor di 512,000 euro desde dia 1 di april. Hendenan cu por cumpra un cas den e prijs aki lo ta obliga di biba den e cas aki nan mes pa por lo menos 4 aña. E cas no por ser poni na huur durante e periodo aki. Esaki ta preveni cu inversionistanan ta cumpra e casnan di prijs abao den e ciudad y despues huur nan na prijsnan halto.
